MUUNGANO YAENDELEZA UBABE KWA KIZZY STARS

NA MWINYIMVUA NZUKWI

Wakongwe wa soka wilaya ya Magharibi ‘A’ Unguja timu ya Muungano Rangers ya Dole imekamilisha mzunguko wa 6 wa ligi daraja la pili wilayani humo kwa kuwafunga wapinzani wao wa jadi Kizzy Stars ya Kizimbani goli 1 - 0 katika mchezo mkali uliochezwa katika dimba la Mwakaje.

   

Rangers iliyoteremka kutoka daraja la pili taifa msimu uliopita ilianza harakati za kusaka ushindi huo toka katika dakika za awali za mchezo huo na kukabiliana na upinzani wa hali ya juu kutoka kwa wachezaji wa timu ya Kizzy ambao walifanikiwa kulifikia lango la Rangers mara kadhaa huku mashabiki wa timu zote mbili wakiuchochea upinzani huo uliopelekea timu hizo kumaliza dakika 45 za mwanzo zikiwa nguvu sawa.

Kama ilivyokuwa katika kipindi cha kwanza timu hizo ziliopo kundi A zilishambuliana kwa zamu kabla ya Muungano kupata goli lake kupitia kwa Farid Abdallah mnamo dakika ya 50 ya mchezo huo uliohudhuriwa na mashabiki wengi wa soka.

Katika mchezo huo timu hizo zinazotoka katika vijiji jirani zilifanya mabadiliko kwa wakati tofauti kwa Muungano kuwatoa Ayoub Zubeir, Saleh Ahmada na James Charles na nafasi zao kuchukuliwa na Mohammed Hiyar, Fadhil Ramadhan na Juma Ramadhan huku Kizzy wakiwatoa Saleh Kassim, Mussa Bakar na Edward Mohammed ambapo nafasi zao zikachukuliwa na Feisal Mohammed, Antony Ali na Mohammed Ali.

Matokeo mengine ya mzunguko huo kwa timu za kundi A, Scud S. C iliibamiza bila huruma Mbuzini F C kwa kuifunga mabao 3 - 0, Kianga International ikaifunga bila huruma Mwakaje star 5 - 2 kabla ya Blue Stars kutoka sare ya bao 1 - 1 na Mtopepo United.

Ligi hiyo itaendelea kesho kwa michezo ya kundi B wakati mabingwa watetezi Kianga United itakapokuwa wageni wa Muzdalfa katika uwanja wa Muungano Dole, Kama F. C itaikaribisha Bamboo F. C katika uwanja wa Bububu Jeshini wakati timu za Kibweni Shooting na Afya S. C zitakamilisha mzunguko huo siku ya Jumamosi katika uwanja wa Muungano Dole wakati Bumbwi Sudi Stars itaumana na Chuini Stars katika uwanja wa Mwakaje.