BARAZA LA WAWAKILISHI KUANZA VIKAO JUMATANO - SHERIA YA MWENENDO WA MAKOSA YA JINAI KUTUNGWA UPYA

NA MWINYIMVUA NZUKWI

JUMLA ya maswali 74 yaliyoratibiwa na Baraza la Wawakilishi Zanzibar yanatarajiwa kuulizwa na kupatiwa majibu katika mkutano wa 9 wa baraza la wawakilishi Zanzibar utakaoanza Februari 7 mwaka huu.

Katibu wa baraza hilo Raya Issa Mselem amewaambia waandishi wa habari ofisini kwake chukwani kuwa maswali hayo yameulizwa na wajumbe wa baraza ambao watapata nafasi ya kuuliza maswali mengine ya nyongeza kwa mujibu wa kanuni.

Amesema pamoja na maswali hayo baraza litapokea na kujadili ripoti za kamati za kudumu za baraza kwa mwaka 2017/2018 na miswaada mitatu ya sheria ukiwemo mswada wa kufuta sheria ya adhabu na kutunga sheria mpya ya adhabu, kuweka masharti bora Zaidi pamoja na mambo mengine yanayohusiana nayo.

“Mswada mwengine ni mswada wa sheria ya mwenendo wa makosa ya jinai namba 7 ya mwaka 2004 na kutunga sheria ya mwenendo wa jinai na kuweka utaratibu bora wa upelelezi wa makossa ya jinai na usikilizaji wa kesi za jinai na mambo mengine yanayohusiana na hayo”, alieleza katibu Raya.

Aliutaja mswada mwengine wa sheria utakaowasilishwa katika mkutano huo kuwa ni  wa kufuta sheria ya kusimamia mwenendo wa biashara na kumlinda mtumiaji ya Zanzibar namba 2 ya 1995 na kutunga sheria mpya ya ushindani halali wa biashara na kumlinda mtumiaji, kuweka masharti bora Zaidi pamoja na mambo mengine yanayohusiana na hayo.

Aidha Raya alieleza kuwa katika mkutano huo serikali itawasilisha taarifa ya mwelekeo wa mpango wa taifa, ripoti kuhusu hoja binafsi  ya mjumbe wa baraza hilo Mohammed Said Mohammed ‘Dimwa’ kuhusu kuweka miundombinu bora kwa watu wenye ulemavu katika maeneo ya umma na taarifa ya wajumbe wanaoliwakilisha  baraza hilo katika bunge la jamhuri ya muungano wa Tanzania.

“Pia tunatarajia serikali itatoa ripoti kuhusu maombi ya wananchi wa Kisakasaka Zanzibar kuhusu namna wanavyoweza kufaidika kutokana na machinjio yaliyopo kwenye maeneo yao pamoja kama yalivyowasilishwa katika mkutano wa mwezi Disemba”, alieleza.

Katika mkutano uliofanyika Disemba mwaka uliopita, Mwakilishi wa jimbo la Mpendae Mohammed Said Mohammed aliwasilisha maombi hoja binafsi yenye maombi ya kupatikana kwa sehemu ya mapato yanayopatikana katika eneo la Kisakasaka ili kuyaendeleza maeneo hayo kutokana na shughuli zinazoendeshwa katika eneo lao ambazo zimekuwa na madhara kwa mazingira na maendeleo ya jamii.

Huu ni mkutano wa 9 toka kuzinduliwa kwa baraza la 9 la Wawakilishi Zanzibar lililopatikana baada ya uchaguzi mkuu wa zanzibar mwezi Machi 2016 baada ya kufutwa kwa uchaguzi wa awali uliofanyika Oktoba 25, 2015 na tume ya uchaguzi Zanzibar.

Katibu wa baraza la wawakilishi Zanzibar Raya Issa Mselem akizungumza na waandishi wa habari (hawapo pichani) katika moja ya mikutano akitoa taarifa kuhusu shughuli za baraza hilo linalotarajiwa kuanza mkutano wake wa 9 Jumatano ya Februari 7, 2018.