MAONESHO YA SIKU YA SHERIA YAFUNGULIWA - BALOZI SEIF AWATAKA MAJAJI, MAHAKIMU KUSIMAMIA HAKI

NA MWINYIMVUA NZUKWI

Makamo wa pili wa Raisi Zanzibar Balozi Seif Ali Iddi amewataka majaji na Mahakimu kuendesha kesi kwa haraka ili wananchi wanufaike na haki zao za msingi juu ya mashtaka wanayoyafungua.

Akizungumza wakati wa ufunguzi wa Maonesho ya Shamrashamra za Siku ya sheria huko katika Viwanja vya Misara Mjini Unguja Balozi Seif amesema kumekuwa na malalamiko mengi kwa wananchi juu ya kucheweshwa kesi katika kupewa hukumu.

Amesema kutolewa hukumu kwa wakati kutawawezesha wananchi kuendelea kuripoti kesi mbalimbali zinazotokea katika jamiii ili kuzuia wimbi la wavunjifu wa sheria.

Hata hivyo balozi seif amewataka wananchi kutumia vyema fursa  ya maonesho hayo katika kujifunza sheria pamoja na kupeleka malalamiko yao kwa kwa mawakili mbalimbali waliopo ili waweze kutatuliwa matatizo ya kesi zao.

Amesema kuna wimbi kubwa la wananchi hawajui sheria jambo ambalo linasababisha kushindwa kukata rufaa baada ya kutoridhika na hukumu inayotolewa na mahakama juu ya mashtaka wanayofungu jambo ambalo linapelekea kukosa haki zao pamoja na kulalamika mitaani.

Aidha balozi iddi ametowa wito kwa Mahakama kuwa na utamaduni wa Kufungua maonesho hayo mwaka kila mwaka ili kuwawezesha wananchi kujifunza sheria za nchi yao.

Kwa upande wake Jaji Mkuu wa Zanzibar Omar Othaman Makungu amesema lengo la kuwepo kwa Maonesho hayo kutowa elimu ya sheria kwa wananchi ili kujua haki zao na namna ya kufuatilia mashtaka yao mahakamani.

Amesema katika kuhakikisha elimu hiyo inawafikia walengwa Maonesho hayo pia yameshirikisha wafanya biashara mbali mbali kujifunza elimu ya sheria pamoja na kuuza na kutanga bidhaa zao hali hiyo inaenda sambamba na kauli mbinu ya siku ya sheria inayolengwa kuimarisha 'Utawala wa sheria kwa kukuza Uchumi wa Nchi'.

Siku ya sheria inatarajiwa kufikia kilele Februari 12 mwaka huu, ambapo kwa Zanzibar maadhimisho hayo yanatarajiwa kufanyika katika ukumbi wa zamani wa Baraza la wawakilishi Mjini Unguja.

Makamu wa Pili wa Rais wa Zanzibar Balozi Seif (wa pili kushoto) akikata utepe kuashiria ufunguzi rasmi wa Maonyesho ya Siku ya Sheria Zanzibar katika Viwanja vya Maisara Suleiman Mjini Zanzibar. Wa kwanza kushoto ni Naibu waziri wa nchi ofisi ya Rais, Katiba, Sheria, Utawala bora na Utumishi wa Umma Khamis Juma Mwalim na wa kwanza kulia ni Jaji mkuu wa Zanzibar Omar othman Makungu.