MWINYI AHIMIZA MISAADA KWA JUMUIYA YA JAI, ACHANGIA

NA MWINYIMVUA NZUKWI

WAZIRI wa Ulinzi na Jeshi la Kujenga Taifa Dk. Hussein Ali Mwinyi wa jamhuri ya Muungano wa Tanzania amewahimiza wadau wa maendeleo nchini kuunga mkono juhudi zinazochukuliwa na jumuiya ya kiislamu ili kufikia malengo ya kusaidia wananchi katika masuala mbalimbali likiwemo la afya.

Akizindua kambi ya uchunguzi wa afya na matibabu katika viwanja vya Maisara mjini Zanzibar iliyoandaliwa kwa pamoja na Jumuiyat Akhalqul Islamiya (JAI) kwa kushirikana na madaktari wa Jumuiya ya Jamii Bora Health Services, taasisi MIMI na WEWE, Wizara ya Afya na Ofisi ya Mkuu wa mkoa wa Mjini Magharibi, Dk. Mwinyi amesema hatua hiyo itasaidia jumuiya hizo katika kutoa huduma za afya kwa wananchi wengi na kwa wakati.

Amesema kuwa kila mtu anawajibu wa kutoa sadaka kwa lengo la kuwasidia watu wenye mahitaji na wasiojiweza jambo ambalo litapelekea kupata nyongeza ya kheri kutoka kwa Mwenyezi Mungu hivyo ipo haja ya kila mwanajamii kutoa michango yao kwa mujibu wa uwezo alionao kwa lengo la  kujenga jamii yenye amani, upendo na maelewano.

“Jumuiya hii ina malengo makubwa na bila ya kuungwa mkona na wadau mbali mbali wakiwemo wafanyabiashara, viongozi wa serikali, balozi za nchi mbali mbali na wadau wengine ni vigumu kuweza kufikiwa hivyo ninatoa wito kwa kila mmoja wetu kutoa sadaka yake ili kuchangia kufikiwa kwa malengo ya jumuiya hii”, amesema Dk. Mwinyi.

Akizungumza katika hafla hiyo, Waziri  wa  Afya Zanzibar Hamad  Rashid  Mohammed amewataka  madaktari  nchini pamoja na kufanya kazi katika taasisisi zao kuanzisha  utaratibu  wa  kutoa huduma  za afya bure kila  sehemu  kwani  kufanya  hivyo  kutasaidia kuondoa  matatizo ya kiafya yanayowakabili wananchi wengi na kupata watu wenye afya bora.

Waziri Hamad amezipongeza taasisi zilizoshirikiana kutoa huduma kwa kuamua kufanya jambo hilo katika mkoa wa Mjini Magharibi kwa kuwa limetoa funzo katika  jamii  juu ya umuhimu wa kujitolea kwa ajili ya wananchi katika vita dhidi ya maradhi  mbalimbli  hapa  nchini.

“Hatua ya ndugu zetu hawa ya kufanya uchunguzi wa maradhi ni somo jipya linalopaswa kuzingatiwa na kiola mmoja wetu ili tuondokane mna ile tabia ya kwenda hospitali baaya ya kuumwa kwani mtu anapojua mapema afya yako mapema inasaidia piaserikali kujua ni namna gani ya kukabiliana na maradhi yanayowakabili zaidi watu wetu”, amesema.

Aidha aliwashauri madaktari wa Zanzibar kuiga utaratibu ulioanzishwa na madaktari wa Tanzania bara wa kuanzisha jumuiya na kutoa huduma kwa jamii kwa kujitolea ili kusadia kutanua wigo wa utoaji wa huduma za matibabu kwa wananchi wa pandew zote mbili za jamhuri ya muungano wa Tanzania.

Kwa upande wake Mkuu  wa Mkoa Mjini Magharibi Ayoub Mohammed Mahmoud ameziomba jumuiya hizo kuendelea kuisaidia jamii katika shughuli nyengine za kijamii ili kuondoa changamoto mbali mbali zinazokabili wananchi wa Tanzania.

Amewapongeza kwa uamuzi wao wa kutoa huduma hizo kwa wananchi wa mkoa wake na kuwataka wananchi hao kutumia kikamilifu fursa hiyo ambayo itahusisha uchangiaji wa damu, upimaji na uchunguzi wa maradhi mbali mbali yakiwemo ya saratani za matiti, tezi dume na shingo ya kizazi.

“Hakika kulikubali kwetu kwa haraka jambo hili linaonesha utayari wetu wa kushirikiana na taaasisi za kiraia katika kustawisha huduma za jamii yetu na niwaombe wennzetu wa JAI pamoja na kuwa hii ni mara yao ya kwanza kufanya kazi hii hapa Zanzibar, naomba isiwe mara ya mwisho kwani bila shaka wahitaji wataendelea kuwepo hata baada ya kambi kufungwa hapo kesho”, amesema Mkuu huyo wa Mkoa.

Kambi hiyo ya siku mbili inaendeshwa na zaidi ya wataalamu wa afya 60 wakiwemo madaktari bingwa wa maradhi mbali mbali yakiwemo ya moyo, kina mama na watoto ambapo Dk. Mwinyi aliichangia jumuiya ya JAI shilingi milioni 5 na Waziri wa  Afya Zanzibar Hamad Rashid alinunua msahafu ulionadiwa katika hadhara hiyo kwa shilingi milioni 1 kama sadaka yake kwa jumuiya hiyo kwa lengo la kuendeleza harakati zake.