'MABODI' - CCM INATAMBUA MCHANGO WA DIRECT AID, WADAU WA MAENDELEO

NA MWINYIMVUA NZUKWI

NAIBU Katibu Mkuu wa Chama Cha Mapinduzi (CCM) Zanzibar Dk. Abdulla Juma Saadalla ‘Mabodi’ amesema CCM taasisi inayothamini juhudi na mchango wa kuwasadia watoto yatima zinazofanywa na wadau wa maendeleo kutoka ndani na njue ya nchi.

Hayo aliyasema wakati alipotembelea Kituo cha kulelea watoto yatima kinachodhaminiwa na shirika la ‘Direct AID’ la Kuwait kilichopo Mwanakwerekwe uwanja wa Ijitimai ya zamani Unguja.

Dk. Mabodi alieleza kuwa ameridhishwa na juhudi za kituo kinachowapatia malezi bora watoto yatima wanaolelewa na shirika hilo na aliliashukuru shirika hilo kwa kufanya kazi ya kuisaidia Serikali ya Mapinduzi ya Zanzibar katika masuala ya kijamii hususani ya uimarishaji wa huduma za maji safi na salama na elimu.

Dk. Mabodi alisema kwamba CCM itaendelea kuwa karibu na mashirika mbali mbali yenye dhamira ya kuendelea kuunga mkono juhudi za serikali katika kutatua kero na changamoto za jamii.

Amefafanua kwamba watoto ambao wazazi wao wamefariki wasipotunzwa na kuhudimiwa vizuri wanaweza kukosa haki zao za msingi zikiwemo malezi mazuri na elimu bora hivyo ipo haja kwa wananchi wa maeneo mbali mbali kuwa karibu na watoto hao kwani wengi wao wanakuwa wakitengwa na kufanyiwa vitendo vya udhalilishwaji vikiwemo vya kutopatiwa huduma muhimu za kibinadamu.

“CCM tutakuwa karibu zaidi na Direct AID kwani mmeamua kuisaidia jamii yetu nasi lazima tuonyeshe ungwana wetu wa kushirikiana nanyi kutatua changamoto zinazowakabili katika upangaji wa mikakati yenu ya kuisaidia jamii”, alisema Dk. ‘Mabodi’.

Nae Mkurugenzi wa shirika hilo, Dk. Ayman Mohamed alisema shirika hilo limekuwa mstari wa mbele kuwapatia elimu watoto hao ili waweze kujitegemea mara baada ya kumaliza muda wa kuishi katika kituo hicho.

Alisema kituo hicho kimetoa vijana wengi wasomi wanaofanyakazi katika sekta mbali mbali za serikali na binafsi na kuesisitiza kuwa taasisi yake itaendelea kutekeleza malengo yake kwa kujenga vituo vya kisasa vya kulelea watoto yatima vitakavyokuwa na shule, vituo vya Afya na vyuo vya masomo ya dini ya kiislamu kwa Unguja na Pemba.

Akizungumza mmoja ya vijana waliolelewa katika Kituo hicho, Mhandisi Abdullah Salum Kassim alisema kituo hicho kimemlea akiwa na umri mdogo na kumsomesha hadi ngazi ya elimu ya juu ambapo hivi sasa ni mtumishi serikalini.

Alikiri kuwa mafanikio hayo yametokana na utaratibu mzuri uliowekwa na serikali wa kuruhusu shirika la Direct AID kuwasaidia watoto yatima.

“Shirika hili limenilea nikiwa mtoto mdogo na kunisomesha mpaka nimekuwa mtu mzima mwenye familia ambaye pia nawasaidia vijana wenzangu ambao nao wazazi wao walifariki wakiwa wadogo”, alifafanua Mhandisi Abdulahi.

 Nae Diwani wa Wadi ya Meli nne, Saleh Juma Kinana ambaye pia ni miongoni mwa vijana waliolelewa katika Kituo hicho, alisema watoto yatima wanatakiwa kulelewa na kuthaminiwa kama walivyo watoto wengine katika jamii.

Kituo hicho kinafuata malezi na miongozo ya dini ya Kiislam kina jumla ya watoto 44 ambao ni watoto yatima.