DK. BASHIRU AHIMIZA CCM KUJITEGEMEA, AONYA UBADHIRIFU NA MATUMIZI MABAYA YA MALI ZA CHAMA

NA IS-HAKA OMAR, ZANZIBAR.

KATIBU Mkuu wa Chama Cha Mapinduzi (CCM) Tanzania Dk.Bashiru Ally amesema Chama hicho kinadhibiti mianya ya ubadhilifu wa rasilimali fedha na mali zake ili kijitegemee kiuchumi.

 Alisema endapo rasilimali hizo zitatumika vizuri na kuanzishwa kwa miradi mingine mikubwa ya uzalishaji wa kipato katika ngazi mbali mbali za chama na jumuiya kwa  kuwanufaisha  wanachama wote badala ya watu wachache.

Kauli hiyo aliitoa jana katika mwendelezo wa ziara yake kisiwani Pemba wakati akizungumza na viongozi na wanachama wa Chama cha Mapinduzi wa Mikoa Miwili katika ukumbi wa Fidel Castro uliopo, Mkoa wa Kusini Pemba.

Dk.Bashiru alieleza kuwa lengo la kusimamia dhana ya ukuaji wa uchumi ndani ya chama kupitia vyanzo vyake vya mali na fedha ni kukiondosha chama katika mazoea ya kutegemea ufadhili wa watu wenye fedha wanaokuwa na malengo ya kujinufaisha wenyewe kisiasa.

Pia aliyataja malengo mengine kuwa ni uimarishaji wa maslahi ya watumishi wa CCM na jumuiya zake kwani bado maslahi yao ni ya kiwango cha chini ambayo hayaendani na hadhi ya taasisi yenyewe.

“ Kwa miaka mingi chama chetu kimeondoka katika misingi ya kujitegemea na badala yake kujitokeza kwa watu wenye fedha kukichangia chama wakati wa uchaguzi na mazoezi mengine ya kitaasisi, sasa katika mageuzi haya ya kimuundo tuna dhamira ya chama chetu kukiondosha uko na tukaweza kutumia mali zetu wenyewe kujiendesha kitaasisi.” Alifafanua Dk.Bashiru.

Alieleza kuwa malengo hayo yakifanikiwa utakuwa ni ushindi mkubwa kwa wanachama wa CCM wote kwani tabia za rushwa na makundi ya kusaka nafasi za uongozi kwa kutumia fedha yatakuwa yamedhibitiwa.

Aliwataka viongozi wote wa taasisi hiyo kuunga mkono malengo hayo kwa kuhakikisha wanapunguza matumizi holela ya fedha na badala yake waanzishe miradi itakayowasaidia kujiendesha ili kulinda heshima na hadhi ya CCM mbele ya jamii.

Pamoja na hayo alizitaka jumuiya zote hasa ya umoja wa vijana (UVCCM) kuhakikisha wanakuwa wabunifu kwa kutumia rasilimia walizonazo kwa kuanzisha miradi mikubwa ya kilimo, uvuvi na viwanda vidogo vidogo ili vijana wajiajiri wenyewe.

Katibu Mkuu huyo Dk.Bashiru aliweka wazi msimamo wa Chama Cha Mapinduzi kuwa wale wote waliohusika na kutapeli na kujimilikisha mali za taasisi hiyo kinyume na utaratibu wote watachukuliwa hatua za kisheria.

Naye Naibu Katibu Mkuu wa CCM Zanzibar Dk.Abdulla Juma Mabodi alisema wanachama wote wana haki ya kuunga mkono mambo mema yanayotekelezwa na taasisi hiyo kwa nia ya kuongeza ufanisi.

Alisema wakati wa vyama vya ukombozi vya ASP na TANU viongozi wa wakati huo walifanikiwa kupanga mambo ya maendeleo yaliyodumu kwa muda mrefu kutokana na umoja na mshikamano waliokuwa nao hasa katika masuala ya kuvijenga kimaendeleo vyama vyao.

Dk. Mabodi alieleza kuwa suala la uzalendo katika kusimamia maslahi ya kitaifa ni jambo muhimu hasa kwa viongozi wanaoaminiwa na kupewa dhamana za kuongoza jamii.

Akizungumzia ushindi wa CCM visiwani Zanzibar mwaka 2020 alisema mpaka sasa Zanzibar hakuna upinzani bali kuna vikundi vidogo vidogo vya watu wanaojivisha joho la upinzani wakati wao ni madalali wa kisiasa waliofilisika kifikra.

Naibu Katibu Mkuu huyo alisema CCM itashinda kisayansi kutokana na serikali zake kutekeleza mahitaji ya wananchi wa mijini na vijijini kupitia utekelezaji wa Ilani ya Uchaguzi ya mwaka 2015/2020.

BALOZI SEIF AWATIA MOYO WANAFUNZI KUSAKA ELIMU KWA MAENDELEO YAO, TAIFA

NA MWINYIMVUA NZUKWI

MAKAMU wa Pili wa Rais wa Zanzibar Balozi Seif Ali Iddi alisema wakati Serikali ya Mapinduzi ya Zanzibar inazidi  kuimarisha miundombinu ndani ya Sekta ya Elimu, wanafunzi wanalazimika kujikita kutafuta elimu itakayowajengea maisha ya furaha wao na familia zao.

Alisema wanafunzi wakisoma kwa juhudi, maarifa na kufikia kiwango cha elimu ya juu ya katika vyuo vikuu watakuwa na nafasi kubwa ya kujihakikishia za ajira zilizozoweya kufanywa na Wataalamu wa Kigeni.

Balozi Seif Ali Iddi alisema hayo wakati akisalimiana na wananchi wa kijiji cha Mwambe katika ziara yake ya kukagua maendeleo ya ujenzi wa majengo mapya ya skuli za sekondari zinazojengwa kwa pamoja kati ya Serikali ya Mapinduzi ya Zanzibar na Mshirika wa Maendeleo Mfuko wa Kimataifa wa jumuiya ya maendeleo ya petroli ulimwenguni (OPEC).

Alisema Taifa linahitaji wataalamu wake watakaotokana na wanafunzi ambao wanapaswa kuweka malengo ya kusoma kwa bidii kwa lengo la kuwahudumia Wananchi kwa kiwango cha uzalendo zaidi.

Balozi Seif aliwahimiza watoto wa kike nchini kusoma kwa ziada ili zile kazi za Kitaalamu zinazofanywa na Wanaume akatolea mfano za huduma za Afya wazifanye wenyewe katika azma ya kulinda na kuheshima mila, sila, Tamaduni na hata imani za Kidini.

Katika kutilia mkazo nafasi ya mtoto wa kike kusoma kwa malengo Balozi Seif  ameagiza Wazazi wowote watakaohusika na kitendo cha kuwaozesha  Watoto wao wa Kike wakati wanasoma Uongozi wa Serikali ya Mkoa usimamie katika kuona Vyombo vya Dola vinawachukulia hatua za Kisheria mara moja Wazazi hao ikiwa ni pamoja na kuwaweka ndani.

“Jamii inahitaji kuwa na Ewataalamu wa Kike ambao watahusika kushughulikia huduma zinazofanywa na Wanaume Kitaalamu ambazo hazistahiki kutokana na Tamaduni na Imani wa Kidini”. Alisisitiza Balozi Seif.

Makamu wa Pili wa Rais wa Zanzibar alionya kwamba tabia hii inayoonekana kuendelea kwa baadhi ya Mitaa Nchini inarejesha nyuma maendeleo ya Mtoto wa kike aliyekandamizwa kwa muda mrefu kutokana na mfume Dume uliozoeleka kwa kipindi kirefu kilichopita.

Alieleza kwamba matukio hayo  ni miongoni mwa matendo yanayoonyesha muendelezo wa unyanyasaji wa Kijinsia uliomgubika Mtoto wa Kike unaopswa kuondolewa hivi sasa kutokana na mabadiliko makubwa ya Sayansi na Teknolojia yaliyoanza kumfunulia njia Mtoto wa Kike.

Makamu wa Pili wa Rais wa Zanzibar aliwapongeza Wazazi na Wananchi wa Mwambe kutokana na mwamko wao mkubwa wa kuwapelekea Skuli Watoto wao jambo ambalo linafaa kuigwa na Wazazi wengine Nchini.

Alisema Mikondo Mitatu ya Wanafunzi wanaoingia na kusoma kwenye Skuli ya Mwambe ni ushahidi tosha wa Wazazi hao kutambua uhumihu wa Elimu licha ya Idadi kubwa ya Wakaazi wake ambao Watoto wake walikuwa wakipenda sana kufanya kazi za U vuvi.

Mapema Mkuu wa Mkoa Kusini Pemba Mheshimiwa Hemed Suleiman Abdullah alisema ziara zake za Majimbo Tisa akijumisha na maskuli yaliyombo kwenye Majimbo hayo  zimemthibitishia kukithiri kwa utoro kwenye Skuli nyingi za Mkoa huo.

Mh. Suleiman alisema bila ya Elimu hakuna Daktari, Mwalimu na hata Mhandisi, na katika kutambua umuhimu huo Serikali ya Mkoa imeamua kwa makusudi Mzazi ambae mtoto wake atatoroka Skuli atakamatwa na kushtakiwa kwa kosa la kumkosesha haki ya Elimu Mtoto wake.

Mkuu huyo wa Mkoa Kusini Pemba amewapongeza Swananchi wa Mwambe  kwa uwamuzi wao wa kuimarisha Ulinzi Shirikishi katika Shehia yao kitendo kilicholeta faraja na Amani katika eneo hilo.

Mh. Hemed alisema Kijiji cha Mwambe kilikuwa kikitajika kwa vitendo vya wizi wa mazao na ulevi vilivyosababishwa na baadhi ya Vijana waliokosa muelekeo kutokana na kukosa Taaluma ya Kimaisha.

Makamu wa Pili wa Rais wa Zanzibar alikagua Maendeleo ya ujenzi wa Skuli za Sekondari za Mwambe na Wara Ndugukitu na kuridhika na hatua iliyofikiwa ya ujenzi wa Skuli hizo.

Balozi Seif aliwahimiza Wahandisi wa ujenzi wa Majengo hayo kuongeza jitihada ili kuhakikisha kwamba Miradi hiyo inakamilika katika wakati uliowekwa pamoja na kiwango cha hadhi inayokubalika ya kimajengo.

Mapema asubuhi Balozi Seif  alikagua Bara bara mpya inayojengwa kwa kiwango cha Lami katika Kijiji cha Ole hadi Kianga inayokadiriwa kuwa na urefu wa Kilomita 10.

Afisa Mdhamini Wizara ya Ujenzi, Mawasiliano na Usafirishaji Hemed Baucha alimueleza Balozi Seif  kwamba kipande kilichobaki cha Bara bara hiyo kimechelewa kumalizika kutokana na Nyumba Nne zilizolazimika kuvunjwa kupisha ujenzi huo ambazo mwanzoni hazikuwamo.

Hata hivyo  Baucha alisema Wataalamu wa Wizara hiyo wameshafanya tathmini na taratibu za malipo ya Fidia kwa Wananchi wanaohusika na Nyumba hizo zikamilike.

Balozi Seif alipongeza Wataalamu wa Idara ya Utunzaji na Ujenzi wa Bara bara {UUB} kwa kazi kubwa na nzuri waliyoifanya ambapo Serikali Kuu imeridhika na Taaluma waliyonayo Wahandisi hao wazalendo.

Alisema wakati Serikali inajitahidi kuangalia uwezekano wa kuwapatia vifaa zaidi vya ujenzi Wahandisi wa Idara hiyo lakini bado wana dhima ya kuhakikisha kazi wanazopewa wanazikamilisha kwa wakati muwafaka.

Wakati huo huo Balozi Seif  alifika Pagali kuangalia maendeleo ya ujenzi wa Nyumba za Makaazi ya Makamu wa Pili wa Rais wa Zanzibar Ujenzi unaofanywa  chini ya Wahandisi wa Kikosi Maalum cha Kuzuia Magendo Zanzibar (KMKM).

Mshauri Muelekezi Mkuu  wa Ujenzi huo Mhandisi Ramadhan Mussa Bakari alimueleza Balozi Seif kwamba Ujenzi huo ulioanza Rasmi Juni 23 mwaka huu unaendelea vyema licha ya changamoto ya upatikanaji wa huduma za Maji.

Mhandisi Ramadhan alisema ili kazi hiyo iendelee kama ilivyopangwa na kukusudiwa upo umuhimu wa kuchimbwa Kisima ndani ya eneo hilo ili kuwa na uhakika wa upatikanaji wa huduma hiyo muhimu.

Akikagua baadhi ya Majengo ya Nyumba hizo Makamu wa Pili wa Rais wa Zanzibar Balozi Seif aliridhika na kiwango pamoja na uharaka wa Wahandisi hao wanaouendeleza na kujenga matumaini yake ya kumalizika Mradi huo kwa wakati uliopangwa.

PICHA NA MAELEZO YAKE

Wananchi wa Kijiji cha Mwambe kisiwani Pemba wakisimkiliza Makamu wa Pili wa Rais wa Zanzibar Balozi Seif Ali Iddi (hayupo pichani) baada ya kukagua Mradi wa Ujenzi wa Skuli ya Sekondari ya Mwambe inayojengwa kijijini hapo.

Mhandisi wa Ujenzi wa Skuli ya Sekondari ya Wara Ali Khamis Shaibu (alienyoosha mkono) akitoa maelezo kwa Balozi Seif (mwenye miwani) kuhusiana na maendeleo ya ujenzi wa majengo ya Skuli hiyo unaokwenda kwa wakati uliopangwa. Wa kwanza kulia ni Naibu Waziri katika ofisi ya Makamu wa pili wa Rais Mihato Juma N'hunga.

Balozi Seif Ali Iddi (kushoto) akimchum mtoto Sulhia Ali wa Kijiji cha Mwambe huku Mama Mzazi wa mtoto huyo (kulia) akitabasamu mara baada ya kusalimiana na wananchi wa kijiji hicho kukagua maendeleo ya ujenzi wa skuli ya Sekondari ya Wara.

Naibu Katibu Mkuu Wizara ya Elimu na Mafunzo ya Amali Zanzibar Maalim Abdulla Mzee Abdulla (wa pili kulia) akiteta jambo na Makamu wa Pili wa Rais wa Zanzibar Balozi Seif  kwenye majengo ya Skuli Mpoya ya Sekondari inayojengwa katika Kijiji cha Wara Chake Chake Pemba.

Balozi Seif akikagua baadhi ya Majengo ya nyumba za makaazi ya Makamu wa Pili wa Rais wa Zanzibar zinazojengwa katika eneo la Pagali Wilaya ya Chake chake Pemba.

PICHA KWA HISANI YA OMPR.

"HATUKURUPUKI KUWEKEZA KATIKA MIRADI YA MAENDELEO" - DK. SHEIN

NA MWINYIMVUA NZUKWI, ZANZIBAR

Rais wa Zanzibar na Mwenyekiti wa Baraza la Mapinduzi Dk. Ali Mohamed Shein ameeleza kuwa uwekezaji unaofanywa katika maeneo mbali mbali unalenga kukuza uchumi na kunguza tatizo la ajira kwa wananchi wa Zanzibar.

Akizindua biashara katika mji mdogo wa Fumba unaojengwa na kampuni ya CPS-lives katika shehia ya Nyamanzi wilaya ya Magharibi ‘B’ Unguja, Dk. Shein alisema hatua hiyo inachukuliwa na kutekelezwa kwa umakini kati ya serikali na sekta binafsi.

Alisema katika kuekeleza dhana ya uhusiano kati ya serikali na sekta binafsi (PPP), serikali yake imeweka miundombinu rafiki ya kuiwezesha sekta binafsi kutekeleza miradi mbali mbali ikiwemo ya makaazi badala ya serikali kutekeleza miradi hiyo.

Alisema miongoni mwa hatua hizo ni pamoja na kuanzisha ukanda wa maeneo huru ya kiuchumi na kuipa juklumu mamlaka ya ukuzaji vitega uchumi Zanzibar (ZIPA) inatekeleza mipango mbali mbali na ilani ya uchaguzi wa CCM ili kuongeza kasi ya maendeleo ya jamii.

Aliitaja mipango hiyo kuwa ni dira ya Maendeleo 2020, mkakati wa kukuza uchumi na kupunguza umaskini Zanzibar (MKUZA III) na ilani ya uchaguzi ya Chama Cha Mapinduzi (CCM) ambayo ilirithi ilani ya chama cha Afro Shiraz Party (ASP) iliyoitumia wakati wa uchaguzi mkuu wa Zanzibar wa mwaka 1961 na 1962.

 “ASP iliweka ahadi ya kujenga na kuyaendeleza makaazi ya wananchi wa Zanzibar ambao wengi wao walikuwa na makazi duni azma ambayo inaendelezwa na CCM (Chama Cha Mapinduzi) baada ya mapinduzi ya 1964 na hadi sasa kupitia ilani ya uchaguzi ambayo zinaelekeza serikali zake kwa kushirikiana na sekta binafsi”, alieleza Dk. Shein.

Alisema licha ya uwezo mdigo ilionao serikali yake itaendelea kujenga na kuiiimarisha miji midogo na mji mikongwe wa Zanzibar na kutoa ushirikiano na wawekezaji sambamba na kuzingatia usafi ili kuwavutia wageni na kujikinga na maradhi.

Aidha Dk. Shein aliipongeza kampuni ya CPS-Lives kwa kufanikisha ujenzi wa mradi kwa kasi na kiasi cha kukamilisha nyumba hizo katika kipindi kifupi na kwa kutumia teknolojia inayozingatia uhifadhi wa mazingira.

“Tulipokuja kuuwekea jiwe la msingi mwezi Januari mwaka huu hali haikuwa hivi. Hivyo sina budi kuwapongeza wawekezaji wa mradi huu kwa kutimiza ahadi waliyoiweka wakati ule kuwa wangekabidhi sehamu ya nyumba hizi kwa wateja wao na leo tumeshuhudia wateja 60 waliokamilisha malipo wamekabidhiwa nyumb zao”, alisema Rais Dk. Shein.

Mapema akitoa taarifa ya utekelezaji wa mradi huo, Waziri wa Fedha na Mipango Zanzibar Dk. Khalid Salum Mohammed alisema mradi huo ni miongoni mwa miradi ya uwekezaji inayotekelezwa  kwa faida nchini kutokana kodi inayolipwa serikalini na faida nyengine ikiwemo ya upatikanaji wa ujuzi.

Alisema mradi huo una lenga kuweka haiba ya Zanzibar na kuongeza fursa za ajira kwa wananchi, utasaidia kupunguza msongamano katika maeneo ya mji wa Zanzibar.

“Wawekezaji katika mradi huu ni walipa kodi wazuri na wametoa ajira za kudumu 250 na ajira za muda zaidi ya 500 sambamba na fursa za mafunzo ya utunzaji wa mazingira jambo ambalo limesaidia kutimiza malengo ya kuhimiza uwekezaji nchini mwetu”, alisema Dk. Khalid.

Nae Mkurugenzi Mtendaji wa kampuni ya CPS-Lives Sebastian Dietzold alimshukuru Dk. Shein kwa kuendelea kufuatilia kwa karibu utekelezaji wa mradi huo na kuahidi kuwa kampuni yake itaendelea kushirikiana na serikali ya mapinduzi Zanzibar.

Amesema toka kuasisiwa kwa mradi huon jumla ya nyumba 400 za awamu ya kwanza zimeshauzwa na 60 katin ya hizo zimekabidhiwa kwa wenyewe katika uzinduzi huo kazi ambayo inatarajiwa kufanyika kila mwezi.

“Mradi wetu umekuwa na manufaa makubwa sio kwetu bali pia kwa vijiji vya karibu yetu vya nyamanzi na dimani kwa kusaidia upatikanaji wa huduma za jamii i pamoja na kuwapatia ajira watu kutoka maeneo mbali mbali ya Zanzibar”, alieleza.

Aliongeza kuwa baada ya kukamilika kwa awamu ya kwanza ya ujenzi huo baadae mwaka huu, awamu ya tatu ya utekelezaji wa mradi huo utaanza ambao utahusisha ujenzi wa majengo ya huduma za jamii na viwanda.

Awali Mkurugenzi mtendaji wa mamlaka ya ukuzaji vitega uchumi Zanzibar (ZIPA) Salum Khamis Nassor alieleza kuwa uendelezaji wa eneo hilo ni sehemu ya utekelezaji wa mpango ulioasisiwa na serikali ya awamu ya 5 iliyoyatangaza maeneo ya Fumba na Micheweni kuwa ni maeneo huru ya uchumi mwaka 1992.

Alieleza kuwa uamuzi huo ulilenga kuimarisha uchumi wa Zanzibar kwa kushirikiana na sekta binafsi kazi ambayo inaendelea kutekelezwa na mamlaka yake kwa kuzingatia sera na sheria za nchi.

Makabidhiano ya nyumba hizo umekuja baada ya kukamilika kwa awamu ya kwanza ya ujenzi huo ambapo nyumba 400 za awali kati ya 2000 zilizokusudiwa kujengwa katika awamu hiyo inayotarajiwa kukamilika baadae mwaka huu.

Mwisho.

    

DK. BASHIRU AWAONYA WAPENDA MAKUNDI

NA OTHMAN KHAMIS, OMPR

Katibu Mkuu wa Chama cha Mapinduzi (CCM) Dk. Bashiru Ali ameeleza kwamba CCM imejipanga na kuanza kuchukuwa hatua za kukabiliana na makundi yenye tabia na nia ya kudhoofisha taasisi hiyo kongwe katika siasa nchini Tanzania.

Alisema Chama hicho kimeumizwa sana  na tabia hiyo mbovu isiyokubalika aliyoifananisha sawa na ugonjwa wa kansa ambayo huchangia pia kuwachafua viongozi na wanachama wake.

Akijitambulisha rasmi kwa Makamu wa Pili wa Rais wa Zanzibar Balozi Seif Ali Iddi baada ya kuteuliwa kuwa Katibu Mkuu wa CCM Taifa, katika ofisi za Makamu wa Pili Vuga Mjini Zanzibar Dk. Bashiru alisema kinachohitajika sasa ni kuimarishwa kwa chama hicho chenye uwezo wa kuendelea kulinda na kusimamia Uhuru pamoja na Ukombozi wa Taifa hili.

Dk. Bashiru alieleza kwamba katika muelekeo wa uendelezaji wa CCM imara iliyoanza kurejesha imani kwa Wananchi walio wengi suala la makundi limefikia kikomo cha kuepukwa kabisa  kwa vile liko sawa na najisi kwa watu wenye Imani za Kidini.

Katibu Mkuu huyo wa Chama cha Mapinduzi alimueleza Makamu wa Pili wa Rais wa Zanzibar kwamba CCM kamwe haitokubali kushindwa na makundi ya Watu wasiokuwa na muelekeo wa ulinzi wa Ukombozi.

“ Katika utumishi wangu wa  Chama  katika nafasi ya utendaji Mkuu sitokubali kuchafuka wala kuchafuliwa, wala kuwachafua Viongozi wetu Wakuu walioniamini kunipa utumishi huu muhimu katika Chama chetu”. Alisisitiza Dk. Bashiru.

Aliwataka Viongozi waliopewa fursa za kuwatumikia Wananchi moja kwa moja hasa Majimboni kuacha tabia ya kupayuka payuka ovyo kwa vile kinachowapa nguvu ni Heshima ya chama wala si ubinafsi unaoweza kuwavuruga Wananchi wao.

Akigusia utekelezaji wa Ilani ya Chama cha Mapinduzi iliyopata ridhaa ya Wananchi ya kuongoza Dola Bara na Zanzibar  Katibu  Mkuu wa CCM  Dk. Bashiru aliwaagiza Watendaji wa Serikali zote mbili kuendelea na uratibu wa utekelezaji wa kazi za Ilani ndani ya Serikali hizo.

Alisema Ripoti ya Utekelezaji huo wa Ilani utakaoainishwa kwa pamoja wa Serikali zote mbili utapaswa kuwasilishwa katika Uongozi wa juu wa Halmashauri Kuu ya Taifa ya Chama cha Mapinduzi.

Alifahamisha kwamba kitabu kitakachotayarishwa kutokana na Ripoti hiyo ya Utekelezaji wa Ilani wa Serikali zote mbili kitaweza kusaidia kujua masuala yote yatakayoibua mafanikio na changamoto zinazowakabili Wananchi katika maeneo yote Mjini na Vijijini.

Katibu Mkuu huyo wa CCM Taifa alimpongeza Rais wa Zanzibar na Mwenyekiti wa Braza la Mapinduzi Dk. Ali Mohamed Shein kwa uamuzi na busara zake za kuiongoza Zanzibar katika mfumo aliyouanzisha wa Kushirikisha Viongozi na Wananchi moja kwa moja katika utekelezaji wa majukumu yake ya kila siku.

Dk. Bashiru alisema mfumo huo ambao Tanzania Bara haupo hutoa fursa kwa Mawaziri, Wakuu wa Mikoa na Watendaji Wakuu wa ngazi zote za Serikali kuafuatilia changamoto zinazowakabili Wananchi na matokeo yake yamekuwa chachu ya Maendeleo yanayopatikana kutokana na ushiriki wa kila Mwananchi.

Alisema katika kufanikisha maendeleo hayo Dk. Bashiru alishauri Kamati Maalum ya CCM Zanzibar iendelee kupewa nafasi yake katika masuala yote ya Kisiasa yanayoihusu Zanzibar.

Alisema Kamati Maalum iliyoundwa na Chama cha Mapinduzi  kwa kuzingatia mazingira Maalum ya Zanzibar lazima iheshimike kwa vile imeundwa kwa mujibu wa Katiba na Kanuni za Chama hicho.

Makamu wa Pili wa Rais wa Zanzibar Balozi Seif  Ali Iddi ambae pia ni Mjumbe wa Kamati Kuu ya Halmashauri Kuu ya Taifa ya CCM alisema Zanzibar Kisiasa bado iko salama  licha ya upinzani mkubwa unaojitokeza wakati wa chaguzi mbali mbali zinazohusisha Vyama vya CCM na CUF.

Balozi Seif  alisema wakati amani hiyo inaendelea kuwapa fursa Wananchi kuendelea na harakati zao za kimaisha Uongozi wa CCM Zanzibar unaendelea kujiweka tayari ili ujihakikishie inaendelea kuongoza Dola kwa upande wa Zanzibar ifikapo Mwaka 2020.

Dk. Bashiru Ali aliteuliwa kuwa Katibu Mkuu wa CCM baada ya Halmashauri Kuu ya Taifa ya Chama cha Mapinduzi kujiridhisha na sifa na uwezo aliyonao na kupewa jukumu hilo zito la kukisimamia Chama hicho kikiwa miongoni mwa Vyama vikongwe Barani Afrika.

200 KUKIMBIZA BAISKELI JUMAPILI HII

NA MWINYIMVUA NZUKWI, ZANZIBAR

Zaidi ya washiriki 200 kutoka ndani na nje ya nchi wanatarajiwa kushiriki mbio za baiskeli za ‘North Zanzibar Sportive 2018’ zitakazofanyika Agosti 19 mwaka huu katika kijiji cha Nungwi, mkoa wa Kaskazini Unguja.

Mkurugenzi wa mbio hizo Abrahman Hussein kutoka klabu ya mbio za baiskeli ya Dar es salam ijulikanayo 'DARVELO' alisema resi hizo zina lengo kuibua na kuviendeleza vipaji vya wakimbizaji baskeli na kuisaidia jamii ya maeneo ya mkoa huo katika sekta mbali mbali za kijamii.

Alisema mbio hizo zitakazoanzia na kumalizikia katika kijiji hicho, zitawashirikisha waendesha baskeli wanawake na wanaume katika umbali wa kilometa 50 na 100 zitasaidia kupatikana kwa fedha zitakazotumika katika ujenzi wa Skuli ya Chekechea ya kijiji cha Nungwi.

Hussein alieleza kuwa mashindano hayo yatasaidia kuongeza idadi ya watalii nchini na kuongeza pato la taifa kutokana na maombi ya washiriki kutoka nchi mbali mbali ikiwemo Afrika Kusini na nchi nyengine za Ulaya.

“Hatukulenga kupata kipato bali kuongeza umaarufu wa hii resi hizi tunazozifanya kwa mara ya pili na kuvutia watalii ambao watasaidia kuongeza ajira kwa wananchi wetu na kukuza uchumi wan chi yetu”, alieleza Abdulrahman.

Aidha Mkurugenzi huyo alieleza kuwa katika mbio hizo kutakuwa na timu maalum ya wakimbiza baskeli kutoka mwanza inayofadhiliwa na Darvelo Cycling Club ya Dar es salam ili kuwahamasisha wanawake wa Zanzibar kushiriki katika mchezo wa mbio za baiskeli.

Aliwapongeza wadhamini mbali mbali waliojitokeza kudhamini mashindano hayo na kueleza kuwa ufadhili wao utaongeza ushindani miongoni mwa wananmichezo hao ambapo mshindi wa kwanza, wa pili na watatu watapatiwa pamoja na zawadi nyengine, watapatiwa zawadi za fedha taslim.

Kwa upande wake Msemaji wa chama cha Baskeli Zanzibar (CHABAZA) Saleh Kijiba alisema mashindano hayo mbali ya wageni kutoka nje yatahusisha wachezaji kutoka Unguja na Pemba wakiwemo vijana wa chini ya miaka 20 ambao watakimbia kwa umbali wa kilomita 50 pekee.

Msemaji huyo aliwashukuru waandaaji na wadhamini wa mbio hizo ambazo alisema zinaunga mkono juhudi za chama chake katika kuuendeleza mchezo huo ambao umeonekana kudorora katika miaka ya hivi karibuni.

“Mchezo huu una gharama na mara nyingi tumekuwa tukifanya mashindano madogo madogo yanayoshirikisha wakiambiaji wa ndani tuu ila kupitia mbio hizi wakimbiaji wetu watapata kujifunza na kuona changamoto zitakazoimarisha viwango vyao”, alieleza kijiba na kuwataka wadhamini wengine kujitokeza kudhamini shughuli za chama chake.

Mashindano hayo yanatarajiwa kuaanza asubuhi kesho (agosti 19) katika kijiji cha Nungwi kupitia Kiwengwa, Pwani Mchangani hadi Pongwe mbio za kilomita 100 kisha kurejea tena Nungwi kwa kupitia njia hiyo hiyo.

Mbali ya zawadi ya medali na vyeti wakatazopatiwa washiriki wote, washindi watatu wa mwanzo watapatiwa zawadi za fedha taslimu kuanzia shilingi Milioni 1, 500,000 na  na 300,000 kwa Wanaume na Wanawake zilizotolewa na wadhamini wa mashindano hayo ambao ni Mfuko wa hifadhi ya jamii zanzibar (ZSSF), Darvelo cycling club na kampuni ya inayojishughulisha na utunzaji wa mazingira na uoto wa asili ya Kilombero Mitiki.

DK. BASHIRU KUZURU ZANZIBAR KUANZIA KESHO KUJITAMBULISHA

NA IS-HAKA OMAR, ZANZIBAR.

KATIBU Mkuu wa Chama Cha Mapinduzi (CCM) Dk.Bashiru Ally anatarajiwa kufanya ziara ya kikazi ya siku nne visiwani humu Agosti 17 hadi 20 mwaka huu.

Dk.Bashiru anafanya ziara hiyo kwa mara ya kwanza tangu ateuliwe kushika nafasi hiyo Mei mwaka huu baada ya aliyekuwa Katibu Mkuu Abdulrahman Omar Kinana kustaafu.

Akitoa taarifa ya ziara hiyo ya Katibu Mkuu huyo, Katibu wa Kamati Maalum ya Halmashauri Kuu Taifa(NEC),Idara ya Itikadi na Uenezi CCM, Zanzibar Catherine Peter Nao, alisema CCM Zanzibar tayari kimekamilisha maandalizi yote ya mapokezi ya kiongozi huyo.

Catherine alisema katika ziara yake hiyo pamoja na mambo mengine anatarajia kuzungumza na viongozi mbalimbali wa CCM na jumuiya zake na makundi ya kutoka taasisi za vijana visiwani humu.

Aliongeza kuwa ziara hiyo ya Dk.Bashiru itakuwa ni ya kikazi na kujitambulisha kwa wana-CCM ambapo wanatakiwa kujitokeza kwa wingi katika mapokezi ya Katibu Mkuu huyo ambapo atawahutubia wanachama pamoja na wananchi kwa ujumla katika uwanja wa Ofisi Kuu ya CCM Kisiwandui saa 9 alasiri.

“Tunawaomba wanachama wote tujitokeze kwa wingi kushiriki mapokezi hayo ya kiongozi wetu mpendwa ambaye ni mara ya kwanza kuja tukitambulisha na kuzungumzia sera na masuala mbalimbali ya kuimarisha CCM na Jumuiya zake, alisema Catherine.

Akizungumzia ratiba ya ziara hiyo Katibu huyo wa Idara ya Itikadi na Uenezi CCM Zanzibar,Catherine alisema siku ya siku ya kesho Agosti 17 mwaka huu katibu Mkuu huyo atakutana na kuzungumza na Makamu Mwenyekiti wa CCM Zanzibar ambaye pia ni Rais wa Zanzibar na Mwenyekiti wa Baraza la Mapinduzi Dk. Ali Mohamed Shein.

Katibu huyo aliongeza kuwa Dk.Bashiru anatarajia kukutana na na Mjumbe wa Kamati Kuu ya CCM Taifa ambaye pia ni Makamu wa Pili wa Rais wa Zanzibar Balozi Seif Ali Idd.

Alisema mchana wa siku hiyo ya ijumaa atazuru Kaburi la Muasisi wa Mapinduzi Matukufu ya Zanzibar Hayati Mzee Abeid Karume na kuzungumza na watumishi pamoja na Wazee wa CCM Zanzibar ambapo jioni atazungumza na Viongozi na wanachama wa Mikoa minne ya CCM Unguja hapo katika viwanja vya CCM Kisiwandui.

Catherine aliendelea kueleza kuwa jumamosi ya Agosti 18 mwaka huu Katibu Mkuu huyo atazungumza na Wenyeviti wa CCM wa Mikoa na Wilaya, Makatibu wa CCM wa Mikoa na Wilaya, Kamati za siasa za Mikoa na Wilaya, Wabunge, Wawakilishi na madiwani katika ukumbi wa Kamati Maalum Kisiwandui pamoja na kuzungumza na makundi ya vijana katika ukumbi wa CCM Mkoa wa mjini.

Aliongeza kuwa siku ya Jumapili Agosti 19, mwaka huu Katibu Mkuu huyo asubuhi atasafiri kuelekea Pemba kwalengo la kuendelea na ziara yake hiyo ambapo atazungumza na Watumishi wa CCM na  wazee  wa Pemba katika ukumbi wa Ofisi ya CCM Kitengo.

Katibu huyo alisema Dk.Bashiru anatarajia kuzungumza na viongozi na wanachama wa CCM wa Mikoa miwili katika ukumbi wa skuli ya Fidel Castro Mkoa wa Kusini Pemba na jioni anatazungumza na Wenyeviti wa CCM wa Mikoa na Wilaya, Makatibu wa CCM wa Mikoa na Wilaya, Kamati za siasa za Mikoa na Wilaya, Wabunge, Wawakilishi,madiwani na maafisa wadhamini katika ukumbi wa Makonyo Pemba.

Katibu Mkuu huyo atahitimisha ziara yake hiyo siku ya Juma tatu Agosti 20 mwaka huu, kwa kuzuru kaburi la Dk.Omar Ali Juma kisiwani Pemba na kumalizia ziara yake kwa kuzungumza na  makundi ya vijana ambapo jioni atasafiri kuelekea Dar es salaam kuendelea na majukumu mengine.

MSEKWA, MAKINDA, KIFICHO KUWANOA WABUNGE VIONGOZI WA BUNGE

NA MWINYIMVUA NZUKWI

SPIKA wa Bunge la Jamhuri ya Muungano wa Tanzania Job Yustin Ndugai amewataka wabunge wa bunge hilo kutumia kikamilifu mafunzo wanayopatiwa ili waimarishe utendaji wa chombo hicho.

Amesema bunge kama taasisi inayosimamia utendaji wa seriklia na utungaji wa sheria imekuwa ikitoa mafunzo kwa wabunge mara kwa mara yanayolenga kuwajengea uwezo ili waweze kutekeleza majukumu yao.

Akifungua semina ya Kamati uongozi wa bunge katika ofisi ndogo za bunge hilo Tunguu mkoa wa Kusini Unguja, Ndugai alisema bunge lina wajibu wa kuwaendeleza wabunge na watendaji wa chombo mara kwa mara ili kukifanya kuwa uimara.

Alisema ili kuimarisha utendaji wa bunge na wabunge, ofisi yake imeamua kuitisha mafunzo hayo na mengine yatakayofanyika ndani na nje ya nchi ambayo anaamini yatawaimarisha na kuwataka washiriki wa semina hiyo kutumia kuikamilifu uzoefu wa watoa mada walioteuliwa.

“Hii ni nafasi muhimu kwa kila mshiriki hivyo tutumie nafasi ya kuwa na viongozi wastaafu na wataalamu wengine waliopangwa kuwasilisha mada katika semina hii ili kujifunza namna bora ya kuendesha bunge na Kamati zetu”, alisema Spika Ndugai.

Aidha Spika Ndugai aliwataka viongozi wa Kamati na wabunge wa Zanzibar kuitumia ofisi hiyo kikamilifu katika shughuli zao za kibunge na kusisitiza kuwa ujenzi wa ofisi hiyo ulilenga kuimarisha muungano wa Tanzania.

Akiwakaribisha wajumbe wa semina hiyo ambao ni wenyeviti na makamo wenyeviti wa Kamati za kudumu za bunge, Wenyeviti wa tume ya uajiri ya bunge na wajumbe wa Kamati ya uongozi wa bunge, Spika wa baraza la Wawakilishi Zubeir Ali Maulid aliupongeza uongozi wa bunge na Kamati ya maandalizi kwa kuchagua watoa mada wenye weledi na uwelewa mpana katika uendeshaji wa mabunge nchini.

Alisema hatua hiyo itawasadia wajumbe kuchota sehemu ya uzoefu wa viongozi hao ambao wamelitumikia bunge la Tanzania, baraza la wawakilishi, serikali na vyombo mbali mbali vya kimataifa.

“Uamuzi wenu kuwaleta mama makinda (anna semamba), mzee Kificho (Pandu Ameir) na mzee Pius Msekwa ni wa kupongezwa kwani naamini katika muda huu wa siku mbili tutaendelea kujifunza mambo mengi ambayo yatasaidia uendeshaji wa bunge kama taasisi muhimu kwa maslahi ya jamii”, alisema Maulid.

Akizungumzia mafunzo hayo makamo mwenyekiti wa Kamati ya ustawi wa jamii inayoshughulikia ukimwi na dawa za kulevya dk. Jasmine tisekwa bunga alisema ubora wa mada zilizopangwa katika semina hiyo utasaidia kukuza uelewa wa wabunge kuhusiana na mambo mbali mbali yanayohusiana na kazi zao.

“Katika siku hizi tutajifunza kuhusu maadili, itifaki na mgongano wa maslahi katika uongozi wa umma mabo ambayo ndiyo changamoto kubwa sio katika uongozi wa bunge lakini hata katika maisha yetu ya kaweaida”, alisema Dk. Jasmine ambae ni mbunge wa viti maalum anaewakilisha vyuo vikuu.

Aliongeza kuwa pamoja na kuwepo kwa mafunzo kama hayo mara kwa mara, semina hiyo imekuwa ya kipekee kutokana na aina ya wawasilishaji wa mada ambao anaamini watasaidia kubadilisha mitazamo ya viongozi wa Kamati na wabunge kwa ujumla.

Nae Mbunge wa Uzini Zanzibar Salum Rehani Mwinyi alipongeza uongozi wa bunge kuandaa semina hiyo na nyengine amabazo zimekuwa zikiwasaidia viongozi wa Kamati na wabunge kuelewa mambo mbali mbali yanayohusiana na sekta wanazozisimamia.

Alisema hatua hiyo mbali ya kuwajengea uwezo, pia inatoa nafasi ya kutanua uelewa juu ya mambo mbali hasa kutokana na mabadiliko yanayotokea katika uendeshaji wa bunge na utekelezaji wa mipango ya serikali.

“Kwa muda mrefu tumekuwa na seminakama hizi lakini hii imekuwa ya kipekee kwani inatukumbusha juu ya umuhimu wa maadili, utawala bora, itifaki na diplomasia pamoja na njia za kuepukana na mgongano wa kimaslahi katika utendaji wetu kama viongozi wa umma ambao tuna wajibu kwa wananchi wetu, vyama vyetu na bunge kwa wakati mmoja”, alifafanua Rehani.

Mapema akitoa taarifa ya semina hiyo katibu wa bunge stepen kigaigai aleleza kuwa semina hiyo inatokana na ombi la wajumbe vwa Kamati za kudumu za bunge walilolitoa baada ya uchaguzi wa Kamati hizo mwezi Machi mwaka huu imelenga kuwawezesha wajumbe wa kutambua wajibu na majukumu yao katika utekelezaji wa kazi zao.

Semina hiyo ya siku mbili imehudhuriwa na viongozi mbali mbali akiwemo Naibu Spika wa bunge hilo Dk. Tulia Akson huku Maspika wastaafu wa bunge na Baraza la Wawakilishi Pius Msekwa, Anna Makinda na Pandu Ameir Kificho wakipangiwa kutoa mada ya uzoefu katika uongozi wa bunge na Kamati za bunge na elimu ya maadili, uongozi na utawala bora na viongozi itakayowasilishwa na mama Makinda kwa niaba ya Uongozi Institute.

Mada nyengine zitakazowasilishwa katika semina hiyo ni mgongano wa maslahi unavyoweza kuathiri maadili ya viongozi wa umma na wabunge itakayowasilishwa na Katibu wa sekretarieti ya maadili ya umma Waziri Kipacha, nafasi ya viongozi wa bunge na wenyeviti wa Kamati za bunge katika ulinzi na usalama wan chi itakayotolewa na Mluli Mahendeka na elimu kuhusu masuala ya diplomasia, itifaki na tabia kwa wabunge na viongozi itakayotolewa na mwalimu mstaafu katika chuo cha Diplomasia Luke Chilambo.

Pamoja na semina hiyo washiriki wa semina hiyo pia watapata nafasi ya kuonana na Rais wa Zanzibar na Mwenyekiti wa Baraza la Mapinduzi Dk. Ali Mohamed Shein na kufanya ziara katika maeneo mbali mbali ya kihistoria ya mji wa Zanzibar ikiwa ni sehemu ya kuhimiza utalii wa ndani.

MWISHO.

KZU WADHIBITI MOTO MKUNAZINI, RC AYOUB AWATAKA WANANCHI KUCHUKUA TAHADHARI

NA MWINYIMVUA NZUKWI

Kikosi cha Zimamoto na Uokozi Zanzibar (KZU) Agosti 15, 2018 kimefanikiwa kuuzima moto uliozuka majira ya saa moja usiku katika moja ya majengo yaliyopo nyuma ya soko kuu la kuku shehia ya Mkunanizi, mjini Unguja.

Jengo hilo linalotumika kwa biashara na makaazi ya binadamu, linamilikiwa na Haroub Suleiman Nassor ambae amelikodisha kwa hoteli ya Marumaru linatumika kwa makaazi ya wanafunzi wanaofanya mafunzo ya vitendo katika hoteli hiyo pamoja na walimu wao.

Mkuu wa Mkoa wa Mjini Magharibi Ayoub Mohammed Mahmoud (katikati) akizungumza na wanahabari wakati wa shughuli ya uzimaji wa moto. kulia ni Katibu Tawala wa Mkoa huo Hamida Mussa Khamis.

Akizungumza katika eneo la tukio Mkuu wa mkoa wa Mjini Magharibi Unguja Ayoub Mohammmed Mahamoud amewataka wamiliki wa majumba ya mji mkongwe zanzibar kutochanganya matumizi ya nyumba hizo ili kuepusha madhara yanayoweza kutokea pindi majanga ya moto yanapotokea.

Amesema katika jengo hilo lenye maduka ya kawaida na makaazi ya watu, wafanyabiashara wameweka majokofu wanayoyatumia kuhifadhia samaki na vitoweo vyengine jambo lililochangia kutokea kwa moto huo.

Aidha amewashukuru wakaazi wa shehia hiyo kwa hatua za awali walizochukua kuudhibiti moto huo kabla ya kikosi cha Zimamoto na uokozi Zanzibar kufanikiwa kuuzima bila ya kuleta madhara kwa maisha ya waakaazi wa nyumba hiyo.

Akizungumzia tukio hilo mkuu wa kikosi cha zimamoto na uokozi wilaya ya Mjini SSF Suleiman Ahmada Suleiman ameleza chanzo cha moto huo ni kutomika bila kupumzishwa kwa majokofu hayo na kupelekea kutokea kwa hitilafu ya umeme.

SSF Suleiman amesema hali hiyo inasababisha uchakavu na kuwataka watumiaji wa vifaa vya umeme kuzingatia matumizi sahihi ya vifaa hivyo.

Aidha amewatoa hofu wakaazi wa jengo hilo kuwa moto huo umedhibitiwa na kwamba eneo hilo lipo salama kwa matumizi huku akiwataka wananchi kutoa taarifa mapema katika kikosi chao ili kupunguza madhara ya moto au majanga mengine yanapotokea.

Nae sheha wa shehia ya Mkunazini Fuad Mohammed Hussein ameeleza kuwa jengo hilo la ghorofa mbili pamoja na maduka yaliyopo katika eneo la chini, linatumiwa kwa makaazi na wanafunzi wa chuo cha Sillas College waliopo katika mafunzo ya vitendo katika hoteli ya Marumaru iliyopo mjini Zanzibar.

Amesema awali alipewa taarifa ya kutokea kwa moto huo majira ya saa moja usiku na kuanza kutumia vifaa vya kuzimia moto walivyopatiwa na Chama Cha Mapinduzi mkoa wa Mjini hivi karibuni ili kupunguza kasi ya moto huo pamoja na kutoa taarifa polisi na kikosi cha zimamoto na uokozi kwa msaada zaidi.

Kamanda wa polisi mkoa wa Mjini Magharibi Kamishna Msaidizi (ACP) Tobias Sedoyeka aliyefika katika eneo la tukio wakati shughuli za uzimaji zikiendelea aliwapongeza wananchi wa eneo hilo kwa ushirikiano waliouonesha na kuwapa pole watu walioathiriwa na moto huo.

akizungumza kwa niaba ya wenzake mmoja ya wanafunzi hao ambae hakutaka kutajwa jina amesema moto huo ulianzia katika eneo la chini la jengo hilo na kufanikiwa kutoa taarifa kwa watu waliokuwepo maeneo ya jirani na jengo hilo baada ya kuona moshi mkubwa.

"Mimi nilikuwa ndio narudi kutoka kazini ila wenzetu waliokuwepo walisema waliona moshi mwingi ukiingia vymbani huku watu wengine wakipiga kelele za moto ndipo walipotoka ili kupisha watu wa zimamoto lakini tunashukuru sote tupo salama", amesema.

Aidha amewahakikishia wananchi hao kuwa jeshi lake litaendelea kuweka ulinzi katika eneo ili kulinda wananchi hao na mali zao.