MAPINDUZI KUZINDUA MIRADI 49, SHILINGI BILIONI 1.2 KUTUMIKA

Na Mwinyimvua Nzukwi

MIRADI 49 ya kiuchumi, maendeleo na ustawi wa jamii inatarajiwa kuzinduliwa na kuwekewa mawe ya msingi wakati wa shamra shamra za maadhimisho ya miaka 54 ya mapinduzi ya Zanzibar.

Makamu wa pili wa rais wa Zanzibar balozi seif ali iddi ameeleza hayo baada ya kikao cha cha Halmashauri ya Sherehe na Maadhimisho ya Kitaifa anayoiongoza.

Alisema miongoni mwa miradi hiyo, 33 itazinduliwa rasmi baada ya kukamilika wakati miradi mingine 16 inatarajiwa kuwekewa Mawe ya msingi inayojumuisha miradu ya taasisi za umma, miradi ya Jamii sambamba na  ya Wawekezaji vitega uchumi.

Katika kikao hicho kilichofanyika katika makumbusho ya kasri la Mfalme,   Balozi Seif na wajumbe wa halmashauri hiyo walifikia maamuzi ya kuipunguza miradi mitatu iliyoainishwa katika ratiba ya sherehe hizo baada ya kubaini kuwa haikufikia kiwango kinachokubalika.

Kaimu Kamanda wa Brigedi ya Nyuki Kanali Said Khamis Said ambae ni mjumbe wa kikao hicho, alisema kutakuwa na mabadiliko katika gwaride la mwaka huu kutokana na kilele cha sherehe hizo kuangukia katika siku ya Ijumaa hivyo gwaride hilo litamalizika mapema ili kutoa fursa kwa wananchi na viongozi kujiandaa na ibada ya sala ya Ijumaa.

Katibu Mkuu Ofisi ya Makamu wa Pili wa Rais wa Zanzibar Dk. Idriss Muslim Hijja alisema miradi yote iliyopendekezwa kuingizwa katika maadhimisho ya Mwaka huu imefuatiliwa na kutolewa taarifa kwa  sekriterieti  na kufanyiwa marekebisho kwa kiwango kinachohitajika kuingizwa katika ratiba ya sherehe.

Katika hatua nyengine waziri wan chi ofisi ya makamo wa pili wa rais wa Zanzibar Mohammed Aboud Mohammed amewaambia waandishi wa habari ofisini kwake jana kuwa wastani wa shillingi billion 1.2 zinatarajiwa kutumika kwa ajili ya maadhimisho  ya sherehe za miaka 54 ya mapinduzi matukufu ya Zanzibar yatakayofikia kilele chake Januari 12, mwakani.

Aboud amesema serikali imepanga kutumia kiasi hicho cha fedha kulingana na umuhimu wa siku hiyo ambapo  kuelekea katika kilele chake shughuli mbalimbali za kitaifa na kijamii zitafanyika  zikiwemo za kuwekewa mawe ya msini na kuzinduliwa kwa  miradi ya maji, majengo ya skuli, Umeme na Barabara ambapo viongozi wa SMZ na SMT  wanatarajiwa kuizindua kulingana na ratiba zitakazopangwa.

Aidha waziri Aboud alisema katika siku ya kilele serikali itaeleza jinsi ilivyopiga hatua katika kufanikisha huduma muhimu za kijamii na maendeleo kazi ambayo ni mwendelezo wa malengo ya mapinduzi matukufu ya Zanzibar yaliyofanyika  mwaka 1964.

Kilele cha sherehe hizo kinatarajiwa kuadhimishwa 12 Januari Uwanja wa Amaan ambapo viongozi mablimbali wa kitaifa na kimataifa wanatarajiwa kuhudhuria akiwemo Rais wa Zanzibar Dk. Ali Mohammed Shein atakaekuwa mgeni rasmi.

Makamu wa Pili wa Rais wa Zanzibar Balozi Seif Ali Idi (kulia) akiongoza kikao cha halmashauri ya sherehe za kitaifa katika ukumbi wa Baraza la Mapinduzi uliopo katika makumbusho ya Kasri ya Mfalme, Forodhani mjini Unguja. (Picha kwa hisani ya OMPR)

FAMILIA ZA WAHANGA WA DRC ZAFARIJIWA

Na Mwinyimvua Nzukwi

Kampuni ya ROM Solution imetoa msaada wa vyakula na fedha taslim kwa familia za askari wa Jeshi la Wananchi Tanzania (JWTZ) waliofariki wakiwa katika ulinzi wa amani nchini DRC mwanzoni mwa mwezi huu.

Hafla ya makabidhiano hayo ilifanyika katika ofisi za Mkuu wa Mkoa wa Mjini Magharibi Unguja, kampuni hiyo ilikabidhi misaada ya chakula na vifaa vya mayumizi ya nyumbani kwa familia kwa wawakilishi wa familia za askari 9 waliozikwa Zanzibar unaokisiwa kufikia shilingi milioni kumi na thelasini elfu.

Akizungumza mara baada ya kukabidhi msaada huo Afisa Mtendaji Mkuu wa kampuni hiyo George Alexandru alisema wameamua kutoa msaada huo ili kuungana na wananchi wa Tanzania katika kupunguza ukubwa wa msiba huo ambao alidai haukupaswa kutokea kutokana na kazi iliyowapeleka askari hao nchini Congo.

"Vifo vya askari 14 vilitokea wakiwa wanalinda amani sio vitani. Ni jambo la kushitua sana na ndio maana tulipopata hii taarifa tukaona haja ya kufanya jambo lolote la kusaidia hasa tukizingatia jukumu walilokuwa nalo askari hao linafanana na shughuli zetu", alisema Alexandru ambaye kampuni yake inajihusisha na uuzaji na ufungaji wa kamera za ulinzi.

Mkuu wa Mkoa wa Mjini Magharibi Uyoub Mahmoud Mohamed aliuelezea msaada huo kuwa umekuja kwa wakati muafaka ambao utasaidia kupunguza majonzi kwa familia za askari hao.

Alisema serikali ya Zanzibar na Tanzania zinafarajika kuona mwitiko wa sekta binafsi katika msiba huo uliohusisha jambo linaloonesha kukubalika kwa kazi za vikosi vya ulinzi na usalama nchini.

"Wenzetu hawa walienda nchini DRC sio kulinda amani ya nchi hiyo tu bali pia ya wananchi wa Tanzania na Afrika kwa ujumla hivyo inapotokea watu wanapoguswa na vifo au madhara waliyoyapata  vinaongeza hamasa ya wapiganaji waliobakia lakini pia familia za walioondokewa na wapendwa wao", alisema Ayoub.

Aidha alieleza kuwa jitihada zinafanywa kati ya kampuni hiyo na jeshi ili kuhakikisha msaada kama huo unatolewa kwa familia 5 za askari waliozikwa Tanzania bara jambo ambalo alisema litatekelezwa na kampuni hiyo.

 Nae Kaimu Kamanda wa Brigedi ya Nyuki Kanali Said Khamis Said alisema jeshi limepokea msaada huo kwa furaha na kuahidi kuwa litaendelea kutekeleza majukumu yake kwa kuzingatia misingi ya uzalendo na uwajibikaji wa pamoja ili kuhakikisha tanzania na afrika inakuwa na amani.

"Sisi kama wapiganaji tumekuwa tukifarajika kila tunapoona wananchi wenzetu wameguswa na kupotea kwa maisha ya wenzetu hawa jambo linalotuongezea nguvu ya kuitumikia nchi yetu kwa uzalendo wa hali ya juu", alisema Kanali Said.

Akitoa shukrani kwa niaba ya wenzake mmoja ya wanafamilia za marehemu aliishukuru kampuni hiyo na serikali kwa kuendelea kushirikiana nao katika mambo mbali ya kifamilia pamoja na misaada ya hali na mali.

Mkuu wa mkoa wa Mjini wa Magharibi Unguja Ayoub Mohammed Mahmoud (akimkabidhi mmoja ya wanafamilia za askari wa jeshi la wananchi wa tanzania (JWTZ) msaada wa wa vyakula na fedha taslimu uliotolewa na kampuni ya ROM Solution Ltd ya Zanzibar kwa lengo la kuwafariji.

Mkuu wa mkoa wa Mjini wa Magharibi Unguja Ayoub Mohammed Mahmoud (kushoto) akimkabidhi mwanafamilia wa askari wa jeshi la wananchi wa Tanzania (JWTZ) marehemu Nassor Daud Iddi msaada wa vyakula na fedha taslimu uliotolewa na kampuni ya ROM Solution ya Zanzibar kwa lengo la kuwafariji. Wa tatu kutoka kushoto ni Afisa Mtendaji mkuu wa  kampuni ya ROM Solution George Alexendru. Anaeshuhudia alivaa miwani ni Katibu Tawala wa mkoa wa Mjini Magharibi Hamida Mussa Khamis. 

Kaimu Kamanda ya Brigedi ya Nyuki Kanali Said Khamis Said (wa kwanza kushoto) akimshuhudia Mkuu wa mkoa wa Mjini wa Magharibi Unguja Ayoub Mohammed Mahmoud (kushoto) akimkabidhi mmoja ya wanafamilia askari wa jeshi la wananchi wa Tanzania (JWTZ) aliefariki nchini DRC - Congo bahasha yenye fedha taslimu uliotolewa na kampuni ya ROM Solution ya Zanzibar kwa lengo la kuwafariji kutokana na msiba huo.                                                                                               

DK. SHEIN ATEUA, ABADILISHA WATENDAJI WA SMZ

Na Mwinyimvua Nzukwi
Rais wa Zanzibar na Mwenyekiti wa Baraza la Mapinduzi Dk. Ali Mohamed Shein amefanya uteuzi na kuwabadilisha nafasi baadhi ya viongozi wa Taasisi mbali mbali za Serikali ya Zanzibar akiwemo aliyekua Mkuu wa Mkoa wa Kusini Pemba Mwanajuma Majid Abdallah.

Mwanajuma alieshika hatamu za uongozi wa Mkoa huo kwa muda mrefu, ameteuliwa kuwa Naibu Katibu Mkuu katika Wizara ya Kazi, Uwezeshaji, Wazee, Wanawake, Vijana na Watoto anayeshughulikia masuala ya Wazee, Vijana, Wanawake na Watoto.

Kufuatia mabadiliko hayo, Dk. Shein amemteua Hemed Suleiman Abdullah kuwa Mkuu wa Mkoa wa Kusini- Pemba, Hassan Khatib Hassan kuwa Mkuu wa Mkoa wa Kusini,  Unguja kuchukua nafasi iliyoachwa wazi na Dk. Muslih Hija alieteuliwa kuwa Katibu Mkuu wa wizara ya nchi ofisi ya Makamu wa Pili wa Rais wa Zanzibar.

Aidha katika mabadiliko hayo Rais pia amemteua aliekuwa Katibu Tawala wa Wilaya ya Magharibi B Hamida Mussa Khamis kuwa Katibu Tawala wa Mkoa wa Mjini Magharibi na Mohamed Abdulla Ahmed kuwa Katibu Tawala wa Wilaya ya Magharibi.

Wengine walioteuliwa ni Daima Mohamed Mkalimoto alieteuliwa kuwa Mkurugenzi wa Idara ya Mipango, Sera na Utafiti katika  Ofisi ya Rais, Katiba, Sheria, Utumishi wa Umma na Utawala Bora kuchukua nafasi ya Abdulla Issa Mgongo anaekua  Mkurugenzi wa Idara ya Mipango, Sera na Utafiti katika Ofisi ya Rais, Tawala za Mikoa, Serikali za Mitaa na Idara Maalum za SMZ.

Aliekuwa Mwenyekiti wa Baraza la Taifa la Michezo Zanzibar (BTMZ) Sharifa Khamis Salim ameteuliwa kuwa Kamishna wa Idara ya Michezo katika Wizara ya Habari, Utalii, Utamaduni na Michezo na Mohamed Issa Mugheir ameteuliwa kuwa Mwenyekiti wa Bodi ya Mikopo ya Elimu ya Juu ya  Zanzibar uteuzi ambao umeanza  Disemba 5, mwaka huu.

 

Aliekuwa Mkuu wa Mkoa wa Kusinin Pemba Mwanajuma Majid Abdallah.

RC AYOUB ATAKA MATENGENEZO YA BARABARA, AAGIZA KUZUIWA LESENI YA JAMBO BAR AND GUEST HOUSE

Na Mwinyimvua Nzukwi

Mkuu wa Mkoa Mjini Magharibi Ayoub Mohammed Mahmoud ametoa wiki moja kwa Uongozi wa Baraza la Manispaa ya Mjini, Idara ya Utunzaji na Uendelezaji, barabara Zanazibar (UUB) na kampuni ya ZECON kuhakikisha wanaifanyia matengenezo barabara ya kwa Biziredi - Misufini ambayo imechimbwa kwa ajili ya kupitisha waya wa umeme na kusababisha usumbufu kwa watumiaji wake na wakaazi wa maeneo hayo.

RC Ayoub alitoa agizo hilo katika siku ya sita ya ziara zake ndani ya mkoa huo kuzungumza na wananchi kusikiliza kero changamoto zinazowakabili ambapo wananchi wanaoishi katika eneo hilo walilalamikia athari zilizoachwa na ujenzi huo.

Alifahamisha kuwa utaratibu wa kukata barabara hiyo haukukamilishwa hivyo aliwataka wahusika wote kuhakikisha wanaifanyia marekebisho barabara haraka na kulitaka baraza la manispaa kufuatilia majukumu yao kwa wakati pindi wanapotoa ruhusa ili kuhakikisha azma ya serikali ya kuimarisha miundombinu inafikiwa kama ilivyokusudiwa.

Aidha Mkuu hoyo wa Mkoa alilitaka Baraza la Sanaa, Sensa ya filamu na Utamaduni kufuta kibali cha kupiga muziki katika ukumbi wa Maisara CCM Social Hall baada ya wananchi wanaoishi jirani na ukumbi huo kulalamikia sauti za muziki jambo ambalo linakiuka agizo la Serikali ya Mkoa Mjini Magharibi la kutopigwa katka siku za katikati ya wiki.

Katika hatua nyengine, Ayoub amelitaka baraza la Manispaa ya Mjini, Kamisheni ya Utalii na Bodi ya vileo kutotoa kibali na leseni ya biashara kwa nyumba ya kulala wageni ya Jambo iliyopo Migombani mjini Unguja kutokana na kusababisha kero mbali mbali kwa wananchi wa maeneo hayo likiwemo la kutumika kama danguro.

“Kwa hili la jambo guest house, taasisi zinazohusika na kutoa vibali na lesini ya biashara naagiza visitolewe hadi tutakapoelewana mwacheni amalizie muda wake lakini kisitolewe kibali kwa ajili yam waka ujao kwani hatuwezi kumwacha mtu mmoja anakera wengine kwa kisingizio cha mapato”, alisema.

Awali akiwasilisha malalamiko yake kwa niaba ya wananchi wenzake mkaazi wa shehia ya Migombani ali khamis mwinyi alieleza kuwa nyumba hiyo ambayo iana baa ndani yake imekuwa kero kwa wakaazi na wageni wa eneo hilo kiasi cha kusababisha maafa.

“Kinachotusikitisha watu wanaokwenda katika hiyo gesti kwa ajili ya ufska baadhi yao hutumia misikiti uliopo jirani na hiyo nyumba kwa kuoga lakini hutupa mipira ya kiume iliyokwishatumika tunategemea kuwa na jamii gani?”, alihoji mwananchi huyo.

Akitoa ufafanuzi juu ya malalamiko ya wananchi kuhusu usafiri wa bodaboda Zanzibar, Katibu wa bodi ya usafiri wa barabarani Mohammed Simba alisema usafiri huo haujaruhusiwa kwa mujibu wa sheria namba 7 ya mwaka 2003 kwa ajili ya kusafirisha abiria na kuwepo kwake ni kinyume na sheria za nchi.

Hata hivyo alieleza kuwa sheria imetoa ruhusa kwa bodi yake kumshauri waziri anaehusika na masuala ya usafirishaji juu ya vyombo vinavyowea kutumika kwa ajili ya usafiri na usafishaji wa abiria hivyo wanaendelea kufuatilia kuona kama ipo haja ya aina hiyo ya usafiri kuruhusiwa.

Mkuu wa Mkoa wa Majini Mgharibi Unguja Ayoub Mohammed Mahamoud (kushoto) akitoa maelekezo  baada ya kupokea malalamiko ya wananchi katika uwanja wa Komba wapya mjini Unguja.

katibu wa biodi na mahakama ya vileo zanzibar  (katikati) akijibu hoja na kutoa ufafanuzi kuhusiana na Baa na nyumba ya kulala wageni ya Jambo iliyopo Migombani baada ya wananchi wa shehia hiyo kuilalamikia. kulia ni mwananchi alietoa malalamiko hayo ali khamis mwinyi na wa kwanza kushoto waliosimama ni mkurugenzi wa manispaa ya Mjini Abou Serenge. (PICHA KWA HISANI YA OFISI YA MKUU WA MKOA).

Na Othman Khamis, OMPR

Makamu wa Pili wa Rais wa Zanzibar Balozi Seif Ali Iddi amesema Zanzibar na Oman zitaendelea kufanya kazi pamoja  katika lengo la kudumisha uhusiano na ushirikiano wa muda mrefu kwa maslahi na maendeleo ya wananchi wa nchi mbili hizo.

Alisema Ushirikiano huo umeimarika zaidi kwa Zanzibar  kupokea ufadhili wa Vijana wake wanaopata fursa za kujiunga na Masomo ya juu Nchini Oman katika fani mbali mbali za mafunzo ikiwemo Udaktari, Uhandisi, Kompyuta pamoja na Lugha.

Balozi Seif Ali Iddi alisema hayo wakati wa mazungumzo yake na Balozi Mpya wa Oman Nchini Tanzania Bwana Ali Abdulla – Al Mahrouq  aliyefika Ofisini kwake Vuga Mjini Zanzibar kujitambulisha rasmi akiambatana pia na Balozi Mdogo wa Oman aliyepo Zanzibar Dr. Ahmed Hamood Al - Habsi.

Alisema Zanzibar inafurahia kuendelea kuwepo kwa uhusiano huo wa kipekee na wa kupigiwa mfano ambao umekuwa ukileta faraja na matunda mazuri yanayotowa fursa zaidi kwa Zanzibar kutanua wigo wa Kimaendeleo na kuongeza maeneo mengine ya ushirikiano wa Kisiasa, Kiuchumi na Kiutamaduni.

Makamu wa Pili wa Rais wa Zanzibar alimueleza Balozi  Ali Abdulla – Al Mahrouq  kwamba uungaji  mkono wa Oman kwa Zanzibar hasa katika utanuzi wa Chuo cha Sayansi ya Afya Mbweni umeleta faraja kwa Wananchi walio wengi kwenye huduma za Afya zinazotarajiwa kuenea katika masafa yasiyozidi Kilomita Tano.

Balozi Seif aliipongeza  Serikali ya Oman kwa msaada wake mkubwa  inayoendelea kutoa kwa Zanzibar hasa kwa kukubali kugharamia matengenezo makubwa ya Majengo ya Kihistoria ya Beit el ajab na Jumba la Makumbusho ya Kifalme yaliyopo Forodhani Mjini Zanzibar.

Alisema msaada huo wa Majengo hayo muhimu umekuja wakati muwafaka kwa vile utasaidia kuhifadhi Historia ya Kiutamaduni na Kiutawala  ya Visiwa vya Zanzibar inayohusisha pia mafungamano  ya Majengo hayo na Oman.

Akigusia ujio wa Meli ya Kifalme ya Fulk Al Salamah kutoka Nchini Oman Makamu wa Pili wa Rais wa Zanzibar Balozi Seif alieleza wazi kwamba Zanzibar imepata faraja  kubwa ya ziara ya Ujumbe wa Serikali ya Oman uliowasili Zanzibar na Meli hiyo ya Kifahari.

 Alisema Wananchi wa Zanzibar wamepata kujifunza mambo mbali mbali kufuatia ujio wa Meli hiyo kwa kupata taaluma ya kuepuka masuala mazima yanayotokana na Sekta ya mafuta ambayo kwa sasa Visiwa vya Zanzibar vimo katika matayarisho ya awali ya kuendesha Miradi inayotokana na Sekta hiyo.

Akigusia suala la Majanga Makamu wa Pili wa Rais wa Zanzibar Balozi Seif  ameishukuru Serikali ya Oman kwa msaada wake wa kuwawezesha Viongozi Wanne Waandamizi wa Zanzibar kupata fursa ya kujifunza  mbinu na Taaluma ya jinsi ya kujikinga na Majanga.

Balozi Seif alisema mafunzo hayo yameleta faida kubwa kiasi kwamba Oman ingefikiria tena kutoa nafasi nyengine kama hizo kwa watendaji wengine wa Taasisi za Majanga Zanzibar  kupata fursa kama hizo katika kipindi chengine kijacho.

Mapema Balozi Mpya wa Oman Nchini Tanzania  Bwana Ali Abdulla – Al Mahrouq  alisema udugu uliopo wa Viongozi  pamoja na hata Wananchi wa kawaida wa Oman na Zanzibar  ni vyema ukaongezeka zaidi katika uhusiano wa masuala ya Kibiashara.

Balozi Al – Mahrouq  alisema pande hizo mbili zimekuwa na historia ndefu ya Kiutamaduni na Kisiasa kiasi kwamba kwa sasa nguvu zikaongezwa katika uimarishaji zaidi wa Kibiashara jambo ambalo linaweza kustawisha kuongeza ukaribu  wa Wananchi wa pande hizo mbili  unaoweza kudumu milele.

Balozi huyo wa Oman Nchini Tanzania alimueleza Makamu wa Pili wa Rais wa Zanzibar kwamba Serikali ya Oman itaendelea kuiunga mkono Zanzibar katika kuhakikisha harakati za Maendeleo na Ustawi wa Jamii wa Wananchi wa Zanzibar unazidi kukua.

Balozi Mpya wa Oman Nchini Tanzania Bwana Ali Abdulla – Al Mahrouq (kushoto)  akijitambulisha rasmi kwa Makamu wa Pili wa Rais wa Zanzibar Balozi Seif Ali Iddi (katikati) alipofika katika Ofisi za Makamu huyo wa Vuga Mjini Zanzibar. Wengine ni Balozi Mdogo wa Oman aliyepo Zanzibar Dr. Ahmed Hamood Al – Habsi (wa kwanza kulia) na Naibu Waziri Wizara ya Nchi Ofisi ya Makamu wa Pili wa Rais wa Zanzibar Mihayo Juma Nhunga.

Makamu wa Pili wa Rais wa Zanzibar Balozi Seif Ali Iddi (kulia) akimkabidhi zawadi ya Mlango wa Zanzibar (Zanzibar door) Balozi Mpya wa Oman Nchini Tanzania Bwana Ali Abdulla  Al-Mahrouq kama ishara ya kufungulia Milango ya uwepo wake nchini.

.
Makamu wa Pili wa Rais wa Zanzibar Balozi Seif Ali Iddi (kulia) akiagana na Balozi Mpya wa Oman Nchini Tanzania Bwana Ali Abdulla  Al - Mahrouq (kushoto) mara baada ya kumaliza mazungumzo yao yaliyofanyika katika ofisi za balozi Seif Vuga Zanzibar. (Picha na OMPR).

MASHEHA WA MJINI MAGHARIBI WAPEWA DOZI YA UGATUZI

Na Mwinyimvua Nzukwi

MKUU wa Mkoa Mjini Magharibi Ayoub Mohammed Mahmoud amewataka Masheha wa Mkoa huo kuzingatia katiba, sheria, sera, kanuni na miongozo mbali mbali ya nchi katika utekelezaji wa wajukumu yao ili kuwahudumia wananchi kwa ufanisi.

Akifungua mafunzo elekekezi ya siku mbili kwa masheha wa hao kuhusu dhana ya ugatuzi wa madaraka kutoka serikali kuu kwenda serikali za mitaa yaliyofanyika katika ukumbi wa zamani wa Baraza la wawakilishi Kikwajuni mjini Zanzibar.

Alisema masheha kama watendaji wa awali wa serikali kuu, wana wajibu wa kisheria wa kuhakikisha wanasimamia mipango ya maendeleo na utowaji wa huduma bora kwa wananchi bila ya kujali itikadi zao kisiasa, dini, kabila na rangi kwa maslahi ya shehia zao na taifa kwa ujumla.

Mahmoud alieleza kuwa kupitia mpango wa ugatuzi, masheha wana nafasi ya kuratibu mipango itakayoandaliwa katika ngazi za serikali za mitaa, wilaya na Mkoa, hivyo wanatakiwa kutumia mafunzo hayo kuimarisha utendaji na kuhakikisha mpango huo unafanikiwa.

Akitoa maelezo katika mafunzo hayo Mkurugenzi wa Tawala za Mikoa na Serikali za mitaa kutoka katika wizara ya nchi ofisi ya rais, tawala za mikoa, serikali za mitaa na idara maalum za serikali ya mapiduzi ya Zanzibar Khalid Abdallah Omari alisema lengo la mafunzo hayo ni kuwajengea  uwezo masheha kuhusu wajibu na maadili ya kiongozi wa umma.

Aidha alisema mafunzo hayo yamelenga kukumbushana wajibu wa utekelezaji wa majukumu yao watendaji hao ili kuepusha mgongano na muingiliano wa majukumu kati ya serikali kuu na serikali za mitaa.

Nae Mkuu wa Wilaya ya Mjini Unguja Marina Joel Thomas aliwataka masheha hao kuwashajihisha wananchi katika maeneo yao kushiriki katika uuandaji na utekelezaji wa wa miradi mbali mbali ya maendeleo ili kustawisha upatikanaji wa huduma mbali mbali za kijamii.

Mafunzo hayo ya masheha yaliyoandaliwa na wizara ya nchi ofisi ya Rais tawala za Mikoa Serikali za mitaa na idara maalum ni muendelezo wa mafunzo yanayotolewa kwa watendaji wa ngazi mbali mbali za uongozi na utawala ili kuleta ufanisi katika utekelezaji wa mpango wa ugatuzi ulioanza kutekelezwa rasmi katika sekta ya elimu ya awali na msingi, afya na kilimo mnamo mwezi julai mwaka huu.

Katika mafunzo hayo viongozi hao walifundishwa mambo mbali mbali ikiwemo wajibu wa masheha kwa mujibu wa sheria ya Tawala za Mikoa namba 8 ya mwaka 2014 , muelekeo wa mkakati wa upelekaji wa madaraka kwa wananchi, umuhimu wa kuweka kumbukumbu, kanuni za usuluhishi wa migogoro katika ngazi za shehia na sheria za usimamizi wa masuala ya ardhi.  

Mkuu wa wilaya ya Mjini Marina Joel Thomas (kushoto) akimuongoza Mkuu wa mkoa wa Mjini Magharibi Ayoub Mohamed Mahmoud (kulia) kuondoka katika ukumbi wa zamani wa baraza la wawakilishi baada ya kufungua mafunzo ya masheha kuhusu ugatuzi wa madaraka kutoka serikali kuu kwenda serikali za mitaa. Nyuma ya Mahmoud ni mkuu wa wilaya ya Magharibi ‘A’ Capt. Khatib Khamis Mwadini.

MKUU wa mkoa wa Mjini Magharibi Ayoub Mohamed Mahamoud akitoa hutuba ya ufunguzi wa mafunzo kwa masheha wa shehia za mkoa huo kuhusiana na dhana ya ugatuzi wa madaraka kutoka serikali kuu kwenda katika serikali za mitaa. Wa kwanza kulia ni Mkuu wa Wilaya ya Mjini Marina Joel Thomas

KATIBU WA ZAMANI ZFA KUWA MJUMBE WA KAMATI YA CHALENJI

Na Mwinyimvua Nzukwi

Makamo wa Rais wa Chama cha Soka Zanzibar (ZFA - Unguja) Mzee Zam Ali ameteuliwa kuwa mjumbe katika kamati itakayosimamia Mashindano ya Chalenji yaliyoandaliwa na Baraza la Vyama vya Soka Afrika Mashariki na Kati (CECAFA) yanayotarajiwa kuanza  Disemba 3 hadi 17 mwaka huu nchini Kenya.

Taarifa iliyotolewa na CECAFA imeeleza kuwa Zam ambaye aliwahi kuwa Katibu Mkuu wa ZFA kwa muda mrefu imeeleza kuwa imefikia uamuzi huo kutokana na uzoefu alionao katika Mashindano mbali mbali yakiwemo mashindano hayo.

Wajumbe wengine waliochaguliwa kuunda kamati hiyo ni Mutasim Gafar kutoka nchini Sudan, Abdigaan Arab Said kutoka Somalia, Jacob Odundo kutoka Kenya, Ashinafi Ejigu wa Ethiopia, Aimable Habimana wa Burundi, Rogers Byamukama wa Uganda, Ajong Domasio Ajong wa Sudan ya Kusini na Ahmed Mgoyi kutoka Tanzania Bara.

Wajumb wengine na nchi wanazotoka katika mabano ni Sunday Kayuni (Tanzania Bara), Mossi Yussuf (Burundi), Celestine Ntangugira (Rwanda), Yigzaw Ambaw (Ethiopia), Bernard Mfubusa (Burundi), Maxim Itur (Kenya), Rogers Mulindwa (Uganda), Bonny Mugabe (Rwanda), Gishinga Njoroge (Kenya), Amir Hassan (Somalia) na Nicholas Musonye (Kenya).

Mashindano hayo yanatarajiwa kushirikisha timu 10 za Tanzania bara, Zanzibar, Kenya, Rwanda na wageni waalikwa Libya zilizopo katika kundi 'A' wakati kundi 'B' linaundwa na timu za Sudani ya Kusini, Ethiopia, Burundi, Uganda na wageni waalikwa Zimbabwe.

 

UJUZI MDOGO KATIKA BIASHARA KIKWAZO KWA WAJASIARIAMALI TANZANIA

Na Mwinyimvua Nzukwi

MAKAMU wa Pili wa Rais wa Zanzibar Balozi Seif Ali Iddi amesema Tanzania ina idadi kubwa ya Wajasiriamali lakini ni kidogo kati yao ndio wenye ujuzi wa usimamizi wa biashara, taarifa na maarifa  yanayohitajika  kukuza biashara zao.

Alisema hali hiyo hupelekea biashara nyingi kufa kutokana na kushindwa kuendana na mahitaji halisi ya kisekta na kushindwa kuhimili ushindani wa soko.

Balozi Seif alieleza hayo wakati akifungua Semina ya Mafunzo ya Fursa kwa vijana wajasiriamali yaliyoandaliwa na taasisi ya Fursa Tanzania katika Ukumbi wa zamani wa Baraza la Wawakishi  Kikwajuni Mjini Unguja.

Alisema Serikali ipo tayari kushirikiana na waandaaji wa semina hiyo ili kutengeneza na kutekeleza mikakati itakayojenga mazingira bora na wezeshi kibiashara itakayoweka miundombinu itakayosaidia maendeleo ya wajasiriamali na vijana nchini.

Alisema Tanzania inatekeleza sera ya uchumi wa viwanda azma ambayo katika kufikia hilo, kundi la wajasiriamali lazima lizalishwe kwa wingi ili kuanzisha, kukuza na kuendeleza viwanda hivyo na kutengeneza ajira, kuchochea uvumbuzi na kuhamasisha ushindani wa soko.

 “Fursa imekuwa ikizunguka nchi nzima ili kuzungumza na vijana kuwaonesha namna wanavyoweza kujiendeleza na kuendeleza shughuli zao. Hili ni jambo zuri hasa wakati huu tunapozungumzia uchumi wa viwanda na kuelekea katika uchumi wa kati ifikapo mwaka 2025”, alisema balozi Seif.

Mapema Muanzilishi wa Taasisi hiyo ambae pia ni msimamizi wa programu ya mafunzo ya iliyolenga kuwakomboa Vijana na Maisha duni Ruge Mutahaba alisema  kuna haja kwa wajasiriamali nchini kubuni maradi au biashara kwa kuzingatia mahitaji ya jamii yake na fursa zinazomzunguka ili kuongeza thamani na kipato cha bidhaa anazozalisha.

Ruge alieleza kuwa wakati umefika kwa jamii kuondokana na mawazo yanayoviza upeo wa ufikiri na kuelewa ku wa mabadiliko yanaanza na mtu binafsi kwa kuzingatia mahitaji yake na mahitaji ya ndani ya jamii.

“Vijana mnaomaliza masomo na wale mlioko vyuoni ni lazima mjuwe kuwa kutokana na ufinyu wa fursa za ajira kitaifa na kimataifa mnalazimika kujitengenezea ajira nyinyi wenyewe zitakazowaongoza kuendesha maisha yenu kwa amani na furaha hapo baadae”, alisema Ruge ambae pia ni mkurugenzi wa Clouds Media Group.

Akitoa salamu za mashirika ya Umoja wa Mataifa (UN) yanayofanyakazi nchini Tanzania, Mratibu Mkaazi wa umoja huo Alvaro Rodriguez alisema Umoja wa Mataifa kupitia taasisi na mashirika yake utaendelea kutoa taaluma kwa makundi mbali mbali ya jamii wakiwemo wanawake kwa lengo la kuwajengea uwezo wa kujiendesha Kimaisha.

Alisema hakuna taifa lolote ulimwenguni linaloweza kupiga hatua za maendeleo ya kiuchumi bila ya mchango wanawake huvyo ilizitaka serikali za Tanzania kuendelea kutoa msukumo kwa kundi hilo kujiendeleza kiuchumi sambamba na kujengewa mazingira mazuri ya kufikia malengo yao.

“Mashirika ya Umoja wa Mataifa yataendelea kushirikiana na taasisi ya Fursa Tanzania ili kusaidia kupunguza au kuondosha changamoto zinazowakabili vijana na wanawake katika kujikomboa kiuchumi”, alisema Rodriguez.

Awali akimkaribisha mgeni rasmi Mkuu wa Mkoa Mjini Magharibi Ayoub Mahmoud Mohamed aliwakumbusha vijana haja ya kuchangamkia fursa za ajira hasa katika sekta za utalii na uvuvi zinazopatikana kwa wingi katika visiwa vya Unguja na Pemba.

Alisema serikali ya Zanzibar imetekeleza wajibu wake kwa kuimarisha miundombinu ya kuwawezesha vijana kujiajiri kwa kuweka sera na mipango mbali mbali ili waweze kuendesha maisha yao katika misingi ya amani na utulivu.

“Serikali kazi yake kubwa ni kutengeneza mazingira rafiki ili jamii na wageni waendeshe maisha yao kwa kuzingatia misingi ya amani na Utulivuhivyo niwatie moyo na kuwaomba kuzitumia kikamilifu fursa zilizopo mkatika sekta ya utalii ambayo inachangia karibu asilimia 27 ya pato la Taifa na ambayo imezalisha zaidi ya ajira 88,000 ambazo nyingi zimechukuliwa na wageni kutokana na wazawa kutochangamkia fursa”, alieleza Ayoub.

Semina hiyo ya kiuchumi ni mwendelezo wa majukwaa yaliyofanyika katika mikoa 13 ya Tanzania bara na Zanzibar kwa ajili ya kutoa mafunzo kwa makundi mbali ya jamii juu ya namna ya kutumia fursa zinazowazunguka kuzalisha ajira a kukuza uchumi wao ambapo kwa mwaka huu imebebe ujumbe wa anzia sokoni.

Baadhi ya washiriki wa Semina ya  Mafunzo ya kuwajenge uwezo vijana wa kupata fursa za ajira wakiimba wimbo wa Taifa kabla ya kufunguliwa kwa semina hiyoiliyofanyika katika ukumbi wa zamani wa Baraza la Wawakilishi Kikwajuni Zanzibar.

 Makamu wa pili wa Rais wa Zanzibar Balozi Seif Ali Iddi akihutubia washiriki wa Semina ya Mafunzo ya Fursa kwa Vijana Wajasiriamali iliyoandaliwa na taasisi ya Fursa Tanzania alipokuwa akiifungua rasmi.

Muanzilishi ambae pia ni msimamizi wa programu ya mafunzo wa taasisi ya Fursa Tanzania Ruge Mutahaba  akitoa darsa kwa Vijana walioshiriki wa Semina ya Mafunzo ya Fursa kwa Vijana Wajasiriamali Zanzibar.

Mratibu nmkaazi wa Umoja wa Mataifa (UN) nchini Tanzania Alvaro Rodriguez akitoa salamu katika ufunguzi wa Semina ya Mafunzo ya Fursa kwa Vijana Wajasiriamali Zanzibar.

Makamu wa Pili wa Rais wa Zanzibar Balozi Seif Ali Iddi akishikili nembo ya taasisi ya Fursa Tanzania inayotoa ujumbe wa 'Nipo Tayari katika Kampeni ya Kitaifa ya usafi wa Mazingira' mara baada ya kufungua semina ya kutambua fursa za ajira kwa vijana. Kuliakwake ni Mratibu Mkaazi wa Umoja wa Mataifa (UN) nchini Tanzania Alvaro Rudreguez, Mbunge wa Jimbo la Mpendae Salum Turky (mwenye kofia) na Mkuu wa Mkoa Mjini Magharibi Ayoub Mahmoud Mohamed. (Picha kwa hisani ya OMPR).

UJENZI WA JENGO LA ABIRIA UWANJA WA NDEGE WA KIMATAIFA ZANZIBAR KUENDELEA MWEZI UJAO

Na Mwinyimvua Nzukwi, Zanzibar

UJENZI wa jengo jipya la abiria  katika uwanja wa ndege wa kimataifa wa Abeid Amani Karume Zanzibar unatarajiwa kuendelea mwezi ujao baada ya kukamilika kwa mazungumzo kati ya serikali ya Zanzibar na serikali ya China ili kurahisisha upatikanaji wa huduma bora za usafiri wa anga  kwa abiria  wanaotumia  uwanja huo.

Akitoa taarifa ya serikali kwa Waandishi wa Habari mjini Unguja, Waziri wa Fedha na Mipango zsanzibar Dk. Khalid Salum Mohammed amesema ujenzi huo ambao ulisisima kwa muda mrefu, unatarajiwa kuendelea kuanzia katikati ya mwezi Disemba kufuatia serikali ya watu wa china kutoa dhamana ya mkopo wa ziada kwa serikali ya Zanzibar kugharamia ujenzi huo kutoka katika benki ya Benki ya Exim ya China.

Alisema kusimama kwa mradi ambao ni miongoni mwa miradi ya uimarishaji wa uwanja huo, ulitoakana na kubadilika kwa muundo wa ujenzi wa jengo hilo uliozingatia mahitaji mapya ya shirika la usafiri wa anga dulinani (ICAO) hali iliyopelekea kuongezeka kwa gharama za ujenzi zilizopangwa awali.

Alisema awali mradi huo ulipangwa kutumia dola milioni 70.4 za marekani ambazo ni mkopo wa masharti nafuu ambazo ziliongezeka na kufikia dola million 128.7 ambazo serikali ya Cina ilishauri zitafutwe mahali pengine na kupelekea kusimama kwa ujenzi huo uliohusisha ujenzi wa jengo hilo, upanuzi wa eneo la maegesho kwa zaidi ya mita za mraba 38,000 na maegesho ya magari ya watumiaji wa uwanja huo.

“Tatizo kubwa lililojitokeza ni upatikanaji wa huizo fedha za ziada, lakini baada ya mashauriano ya muda mrefu kati ya SMZ (Serikali ya Mapinduzi ya Zanzibar), SMT (Serikali ya Jamhuri ya Muungano wa Tanzania) na serikali ya jamhuri ya watu wa china yaliyochukua muda mrefu hatimae benki ya exim imekubali kudhamini mkopo wote wa kugharamia ujenzi huo kwa taratibu za mkopo wa masharti nafuu badala ya masharti ya kibiashara kama ilivyopendekeza awali”, alieleza Dk. Khalid na kuwashukuru wadau wote waliofanikisha kutatua changamoto hizo.

Alisema serikali imepigania kutatua changamoto zilizojitokeza kwa kuamini kuwa kukamilika kwa ujenzi huo utapelekea kuimarika kwa  huduma za kusafirisha abiria na mizigo sanjari na kuzihudumia ndege zitakazotua uwanjani hapo kwa kuzingatia viango vya kimataifa.

“Katika miradi iliyotangulia, tuliimarisha huduma za kiusalama kwa kununua magari mapya ya zimamoto pamoja na kuweka vifaa vya ulinzi na usalama  ili kuimarisha  hali ya usalama katika  eneo hilo  hususani watalii  ambao wana mchango muhimu  katika uchumi wa Zanzibar”, alisisitiza wazir Khalid.

Nae Waziri wa Ujenzi, Mawasiliano na Usafirishaji Balozi Ali Abeid Karume alisema Wizara yake itahakikisha inasimamia kikamilifu ujenzi huo ili uweze kumalizika kwa wakati na kwa ubora uliokusudiwa kwa lengo la kukuza uchumi wa Zanzibar.

Alisema ili kufanikisha hilo imeanza mawasiliano na wizara nyengine ili kuweka mazingira mazuri ya upatikanaji wa rasimilali za ujenzi na kwamba wameshapatiwa maeneo yatakayotumika kwa ajili ya upatikanaji wa mchanga na kifusi ili kuharakisha ujenzi huo.

“Kwa mujibu wa makubaliano mapya, wizara yangu ndiyo itakuwa mwajiri katika mradi huu na tumeshajipanga kuona ni kwa namna gani mradi huu unakamilika kwa wakati na kwa viwango vilivyokusudiwa kwa kuweka wasimamizi wa kazi mbali ya mshauri elekezi, hivyo hakuna kazi itakayotekelezwa na mkandasi au kukubaliwa kabla na sisi kujiridhisha”, alieleza balozi karume.

Aidha alieleza kuwa uwanja huo utakapokamilika unatarajiwa kuwa na uwezo wa kuhudumia abiria  million 1.6 kwa mwaka na  kukabiliana kwa kiasi kikubwa na tatizo la kuchelewa kuhudumiwa kwa abiria wanaowasili au kuondoka kutokana na jengo linalotumika sasa kuwa na uwezo wa kuhudumia watu laki 5 kwa mwaka.

Akifafanua baadhi ya hoja za waandishi, katibu mkuu wa wizara ya fedha na mipango Zanzibar khamis mussa khamis alisema kuendelea kwa ujenzi huo kutapelekea uwanja huo kuweza kupokea ndege za aina zote isipokuwa air bus 3 na kwamba hadi sasa mkandarasi kampuni ya Beijing Construction & Engineering Group ameshalipwa kiasi cha dola 35.2 milioni kwa kazi alizofanya awali.

“Sisi (serikali ya Zanzibar) tulisita kukubali kuingia katika mkopo wenye masharti ya kibishara kwa kujua kuwa usingekuwa na nafuu kama huu ambao ndani yake una ruzuku lakini pia una riba ya asilimia 2 lakini pia una muda mrefu wa malipo ambao ni miaka 25 baada ya kumalizika kwa kipindi cha kujizuia kulipa ambacho kinadhaminiwa na serikali ya china”, alifafanua Katibu Mkuu huyo.

Mradi huo unatarajiwa  kugharimu  Jumla ya Dola za marekani Million 128 utakamilika baada ya kipindi cha miezi 18 kuanzia mwezi ujao, unatarajiwa kuanza majaribio ya awali mnamo mwezi agosti 2019 kabla ya kukabidhiwa rasmi serikalini mwezi disemba mwaka huo.

Waziri wa fedha na Mipanzo Zanzibar Dk. Khalid Salum Mohamed

RC MAHMOUD AHITIMISHA ZIARA YAKE KWA KUHIMIZA UWAJIBIKAJI

Na Mwinyimvua Nzukwi

WATENDEJI na viongozi wa Mkoa wa Kaskazini wametakiwa kubadilika na kutumia falsafa za ‘hapa kazi tu’ na ‘kutofanya kazi kwa mazowea’ ili kuongeza kasi ya upatikanaji wa huduma za jamii mkoani humo.

Akizungumza na wajumbe wa kamati za ulinzi na usalama, watendaji wa serikali za wilaya, mkoa na halmashauri za wilaya za mkoa huo baada ya ziara yake ya  siku 5 Kaimu Mkuu wa Mkoa wa Kaskazini Unguja Ayoub Mahmoud Mohammed alisema ipo haja kwa watendaji hao kutumia ziara hiyo kutathmini utendaji wao na mahitaji ya wananchi wa mkoa huo.

Alisema ili kuongeza imani ya wananchi kwao, hawana budi kuzingatia muda, wajibu na majukumu yao kwa umma ili kupunguza malalamiko ya jamii jamboa alilisema litaongeza imani ya wananchi kwa serikali yao.

Alisema katika ziara hiyo amegundua kuwa kero nyingi zilizokuwa zikitolewa na wananchi dhidi ya serikali na sekta binafsi mkoani humo ni matokeo ya upungufu wa uwajibikaji jambo ambalo lilipunguza imani ya wananchi kutumia huduma zinazotolewa na taasisi hizo kiasi cha kuibua kwa malalamiko miongoni mwa wananchi.

Alisema wananchi wengi waliopata nafasi ya kueleza kero zao walionesha kutoridhishwa na huduma zinazotolewa na watendajiwa serikali za wuilaya, halmashauri na shehia  hivyo kwa pamoja wamekubaliana kubadilika na kufanya kazi kwa juhudi, maarifa na kujituma.

“Ninawaomba tubadilike, kwani wananchi walio wengi na kwa muda mrefu walikosa imani na sisi (serikali) kwa kudhani kuwa hata wakija hatutoweza kuwahudumia ima kwa tofauti zao za kimaeneo au kikanda au kisiasa au kidini jambo ambalo sio dhamira ya serikali zote mbili ambazo zipo kwa ajili ya mkoa ni kuwahudumia wananchi”, alisema RC Ayoub.

Aidha aliawakata kuwa na ujasiri wa kuamua na kutekeleza wajibu waonda watasaidia kuongeza kasi ya maendeleo na kupunguza kiwango cha umaskini wa wananchi wa mkoa huo.

Kabla ya kikao hicho, Mkuu huyo wa Mkoa alikutana na na kamati za ulinzi na usalama za Wilaya na mkoa huo na kukubaliana kuundwa kwa kamati maalum ya kufuatilia maagizo na maelekezo yaliyotolewa wakati wa ziara ambayo yalielekezwa katika maeneo mbali mbali ya kiutendaji.

Baadhi ya maeneo hayo  ni pamoja na kuendelezwa kwa vita dhidi ya dawa za kulevya katika maeneo yote ya mkoa huo, kushughulikiwa kikamilifu kwa migogoro ya ardhi, kufuatiliwa na kuwekewa mkakati wa ajira za wakaazi wa maeneo ya jirani na hoteli za kitalii, udhalilisha wa kijinsia na kudhibitiwa kwa watembeza watalii wasio rasmi katika fukwe za mkoa huo.

Mambo hayo ni miongoni mwa kero zilizotolewa na wananchi wa maeneo mbali mbali ya mkoa huo katika mikutano 11 ya hadhara iliyofanyika katika shehia za Bumbwini Makoba, Mahonda, Nungwi, Kivunge, Kiwengwa, Kinyasini, Upenja, Donge Pwani, Matemwe na Tumbatu uvuvini ambayo ilijumuisha wananchi wa shehia nyengine za jirani nazo.

Ziara ya RC Ayoub ilianza Novemba 7 mwaka huu katika shehia ya Bumbwini Makoba wilaya ya Kaskazini ‘B’ na kuhitimishwa katika shehia ya Tumbatu Uvuvini  wilaya ndogo ya Tumbatu Novemba 12 mwaka huu ambapo wananchi zaidi ya 100 walipata nafasi ya kueleza kero na changamoto zinazowakabili katika maeneo yao zilizohusiana na utendaji wa serikali na sekta binafsi na kupatiwa ufumbuzi wa papo kwa papo na mengine kuelekezwa taasisi husiuka kuzishughulikia.

MAELEZO YA PICHA: Kaimu Mkuu wa Mkoa wa Kaskazini Unguja Ayoub Mahmod Mohammed (katikati) akisisitiza jambo katika mkutano wa majumuisho baada ya ziara yake ya siku 5 mkoani humo. kushoto ni Mwenyekiti wa CCM Mkoa wa Kaskazini Unguja na kulia ni Mkuu wa Wilaya ya Kaskazini 'A' Unguja.

UVCCM MFENESINI KUJIEPUSHA NA MIGOGORO

Na Is-haka Omar,.

KAIMU Naibu Katibu Mkuu wa UVCCM Zanzibar, Abdulghafar Idrissa Juma amewataka viongozi wa Baraza kuu la UVCCM Wilaya ya Mfenesi kuwa sehemu muhimu ya kuwaunganisha vijana na sio kuwagawa katika makundi yatakayoweza kuleta migogoro ndani ya Umoja huo.

Rai hiyo ameitoa leo wakati akifungua Kikao cha kwanza cha Baraza hilo tangu kumalizika kwa Uchaguzi wa ngazi ya Wilaya hiyo  kilichofanyika katika Ofisi za UVCCM Mfenesini zilizopo Bububu Unguja.

Alisema wajumbe wa Baraza hilo wanatakiwa kuwa mstari wa mbele kushughulikia matatizo yanayotokea kwa Vijana ili waendelee kuishi katika misingi ya malezi bora ya Chama cha Mapinduzi.

 “Viongozi mliochaguliwa kupitia Uchaguzi wa Umoja wetu msipofanya vizuri mtakuwa mmeharibu mfumo wa maisha yenu ya kisiasa, lakini mkifanya vizuri itakuwa ni njia ya kupata fursa mbali mbali za kiungozi na kiutendaji ndani ya Chama na Jumuiya  ”, alisema Abdulghafar.

Aliwambia kuwa matarajio ya UVCCM ni kuona Baraza hilo linakuwa ni shamba darasa la kuwapata viongozi imara wenye uwezo wa kujenga hoja zenye nguvu ya kuleta mabadiliko ya kimaendeleo nchini.

Abdulighafar alisisitiza kuwa wajibu wa kila kiongozi ndani ya umoja huo ni kuongoza vizuri sambamba na kuzisoma kwa kina kanuni ya UVCCM na Katiba ya CCM ili maamuzi yoyote yatakayofanyika yaweze kuzingatia matakwa ya Kikatiba.

Aidha Kaimu Katibu Mkuu huyo, Abdulghafar umefika wakati wa kuwa na UVCCM huru yenye nguvu kiuchumi na kiutendaji hivyo viongozi wa umoja huo wanatakiwa kubuni miradi endelevu itakayosaidia vijana kujiajiri wenyewe.

“Vijana tutakapokuwa na uhakika wa kipato kupitia miradi tunayoisimamia wenyewe basi hata hao baadhi ya wanasiasa wenye fedha waliozoea kututumia kwa maslahi yao watakuwa hawana nafasi hiyo tena bali tutasimama wenyewe kutetea maslahi ya chama na jumuiya kwa ujumla.”, alieleza Kaimu Katibu Mkuu huyo.

Mapema  Katibu wa Hamasa na Chipukizi wa Wilaya hiyo aliyemaliza muda wake, Mussa Khamis Mzee  alijiuzulu wadhifa wake ili kupisha kikao hicho kutekeleza utaratibu wa kikanuni  wa kumdhibitisha Katibu atakayeshika nafasi hiyo kwa miaka mitano ijayo.

MAELEZO YA PICHA:

Picha no.9- Kaimu Katibu Mkuu wa UVCCM Zanzibar, Abdulghafar Idrissa Juma akifungua Kikao cha Baraza Kuu la UVCCM Wilaya ya Mfenesini Unguja.

Picha no.11 na 14 Baadhi ya Wajumbe walioudhuria  kikao hicho kilichofanyika katika Ofisi za UVCCM Wilaya ya Mfenesini zilizopo Bububu Unguja.