ZANZIBAR KUADHIMISHA KWA MARA YA KWANZA SIKU YA MISITU DUNIANI

MWINYIMVUA NZUKWI

'Misitu na miji endelevu; tuhifadhi misitu na miti kwa ustawi wa miji ili tuishi kwa furaha'.

Ni ujumbe wa mwaka huu Kimataifa katika kuadhinmisha siku ya misitu ulimwenguni ianyoadhimishwa kila mwaka ifikapo Machi 21.

Pamoja na ukongwe wake toka ilipoasisiwa na umoja wa mataifa mnamo mwaka 2012, bado siku hii ni ngeni miongoni mwa wananchi wa Zanzibar ambao kwa kiasi kikubwa ni watumiaji wa bidhaa za misitu kwa mahitaji mbali mbali ya kijamii kama vile ujenzi, chakula na dawa.

Uwepo wa siku hii bila shaka kama zilivyo siku nyerngine za kimataifa zinazoangukia katika sekta mbali mbali, umelenga katika jambo mahsusi ambalo linahitaji mazingatia na mikakati madhubuti kwa manufaa ya jamii nzima.

Baada ya miaka 6 toka kuasisiwa kwa siku hiyo, Idara ya misitu na maliasili zisizorejesheka Zanzibar inatarajia kuadhimisha kwa shughuli mbali mbali ikiwemo kongamano la wazi kwa wadau wa misitu na wananchi litakalofanyika katika ukumbi wa zamani wa Baraza la wawakilishi Kikwajuni.

 

Kwa mujubu wa maafisa kutoka idara ya misitu na rasilimali zisizorejesheka Zanzibar maadhimisho ya mwaka huu yatajumuisha makundi mbali mbali ya jamii, taasisi za serikali na binafsi kwa lengo la kutoa elimu juu ya umuhimu wa misitu katika maisha ya viumbe hai.

Mkuu wa kitengo cha misitu ya jamii Samira Makame Juma, Mkuu wa kitengo cha utafiti Aziza Yunus Nchimbi na Afisa Msaidizi wa kitengo cha misitu ya jamii Asya Yussuf Khamis wa idara hiyo wamesema katika kongamano hilo wadau wa sekta ya misitu na wengine watapata fursa ya kutathmini mafanikio na changamoto mbali mbali zinazoikabili sekta hiyo nchini.

Walisema pia kongamano hilo limelenga kuamsha ari na kujenga tabia ya jamii kupanda miti katika maeneo wanayoishi ili kukabiliana na mabadiliko ya tabia nchi pamoja na uchafuzi wa hewa jambo ambalo limekuwa likichangia kwa kiasi kikubwa maradhi.

Maafisa hao walisema kwa muda mrefu idara yao imekuwa ikiyahamasisha makundi mbali mbali ya jamii na wananchikupanda miti hasa katika maeneo yaliyoharibiwa na shughuli za kijamii kama vile shughuli za uchimbaji wa mchanga lakini kupitia kongamano hilo wananchi watanufaika zaidi kutokana na mada zitakazowasilishwa ambazo zinazohusiana na ujumbe wa mwaka huu.

 “Utafiti unaonesha kuwa mahitaji ya bidhaa  za misitu zinazotumika nchini kwa mwaka ni juu ya wastani wa uzalishaji unaotokana na eneo la misitu na miti tuliyonayo hivyo upungufu unaojitokeza huzibwa na bidhaa za misitu zinazoagizwa kutoka nje ya nchi na kutokana na pengo hilo ndipo kunakopelekea kutokea kwa wimbi kubwa la ukataji wa misitu na miti kwa mahitaji mbali mbali”, alieleza Aziza yunus nchimbi mkuu wa kitengo cha utafiti katika idara hiyo.

Alieleza kuwa katika kukabiliana na wimbi hilo idara yao imekuwa ikiendesha zoezi la kukamata  misumeno ya moto ambayo inayoonekana kuchochea kwa kiasi kikubwa ukataji wa miti na haribifu wa misitu nchini.

“Hivi karibunu tuanatarajia kuiangamiza misumeno yote iliyokamatwa katika operesheni zilizofanyika ili kutekeleza matakwa ya sheria ambayo imeweka zuio la kuingizwa nchini na kutumika kwa misumeno ya moto  lakini pia bado tutaendelea kutoa elimu kwa jamii kuona umuhimu wa kutunza misitu kwa maisha endelevu ya jamii yetu”, alieleza Samira.

Nae Asya akizungumzia hatua zinazochukuliwa na idara hiyo ili kuzuia uharibifu wa misitu alisema wanaendelea kufanya tafiti mbali mbali ili kubaini ukubwa wa misitu na aina ya miti, wanyama na wadudu wanaopatikana katika misitu hiyo ili kusaidia kuweka mikakati madhubuti ya uhifadhi wa misitu nchini.

“Mtazamo wa idara yetu katika kuendeleza usimamizi wa misitu mijini na vijijini pamoja kwa kusimamia sheria za uhifadhi wa misitu lakini pia kushirikiana na jamii katika kuitunza miti inayopandwa ili kuendelea kupata faida inayotokana na miti bila ya kuathiri mazingira”, alisema afisa huyo.

Katika mwaka uliopita (2017) Shirika la Chakula Duniani (FAO)  liliiadhimisha siku hii katika makao makuu ya shirika hilo mjini Roma, Italia, ambapo Mkurugenzi  mkuu, Jose Graziano da Silva, alifungua maadhimisho hayo yaliyoambatana na uwasilishaji wa ripoti na mada mbali mbali zilizohusiana na ujumbe wa mwaka huo uliokuwa ‘misitu na nishati’.

 Miongoni mwa mada zilizowasilishwa na kujadiliwa ni pamoja na majukumu ya misitu na nishati ya kijani katika utekelezaji wa makubaliano ya Paris ya ‘Nationally Determined Contributions – NDCs’, ambayo ilitolewa na Rais wa Jamhuri ya Fiji, Jioji Konusi Konrote.

Bila shaka baada ya nmwaka mmoja kupita, ipo haja kwa dunia na mataifa wanachama wa FAO kutathmini ni kwa kiasi gani jamii hasa za zinazoishi maeneo ya mijini na vijijini zinaepukana na athari za uharibifu wa misitu bila ya kuathiri mifumo yao ya maisha.

Kwa mfano jamii nyingi zilizopo mijini, hutegemea mkaa kama nishati kwa ajili ya matumizi ya nyumbani, mkaa ambao ili upatikane ni lazima miti ikatwe hivyo ipo haja ya kuwekwa mipango endelevu ya kuendeleza misitu kwa kuhamasisha matumizi ya nishati mbadala.

Miongoni mwa nishati hizo ni pamoja na gesi, umeme asili unaotokana na nmabaki ya vyakula au vinyesi vya wanyama na kadhalika huku hamasa ikiendelea kutolewa kwa jamii kupanda miti ya aina mbali mbali itakayotumika kwa ajili ya nishati yamatumizi ya nyumbani na ujenzi.

Siku ya kimataifa ya misitu ilianzishwa na Baraza Kuu la Umoja wa Mataifa mwaka 2012 na kuanza kusherehekewa kwa mara ya kwanza ulimwenguni kote Machi 21, 2013 na kwa Zanzibar siku hiyo itaazimishwa Machi 21, 2018.

.