DK. SHEIN AHIMIZA UTAWALA BORA, AWATAKA WATENDAJI KUACHA MAZOEA

RAIS wa Zanzibar na Mwenyekiti wa Baraza la Mapinduzi Dk. Ali Mohamed Shein, amewataka watendaji na wananchi wote kutekeleza majukumu yao kwa kuzingatia misingi ya utawala bora na kuacha kufanya kazi kwa mazoea.

Dk. Shein aliyasema hayo leo, katika uzinduzi wa Semina ya Utawala Bora na Uchumi katika ukumbi wa zamani wa Baraza la Wawakilishi, iliyowashirikisha viongozi wa Wizara na Taasisi mbali mbali za Serikali ya Mapinduzi ya Zanzibar. 

Katika hotuba yake, Rais Dk. Shein alisema kuwa Utawala Bora ni nguzo muhimu katika jitihada za kupunguza umasikini hivyo, kila mmoja ana wajibu wa kuhakikisha kuwa anajenga na kulinda maadili mema kwa manufaa ya umma na nchi nzima kwa jumla.

Dk. Shein aliongeza kuwa utawala bora ni suala linalozingatia misingi ya ufanisi na tija, utawala wa sheria na haki za binaadamu, ushirikishwaji, kuzingatia maadili, uadilifu uwajibikaji na uwazi na kuzingatia matakwa ya wananchi.

Aliwataka washiriki wa Semina hiyo wakiwa ni viongozi ni lazima wajiamini kwamba wanao uwezo wa kutosha wa kuleta mabadiliko ya haraka katika nafasi walizokabidhiwa kwa kutumia rasilimali zilizopo na kuwataka kuacha dhana kwamba nchi yao ni changa na haiwezi kufanya mambo makubwa yanayofanywa na nchi nyengine.

Rais Dk. Shein aliwaeleza viongozi hao kuwa semina hiyo ni miongoni mwa juhudi za Serikali za kuimaruisha utawala bora, kama alivyoahidi pamoja na kutoa elimu juu ya mipango mikuu ya maendeleo ya nchi na viongozi wote ni vyema wakaifahamu mipango hiyo na kushirikiana katika kuitekeleza kwa mujibu wa malengo ya Serikali na matarajio ya wananchi.

Dk. Shein alisema kuwa Zanzibar imekuwa na historia ya muda mrefu ya kufuata misingi ya utawala bora; historia ambayo ilianza tangu Mapinduzi Matukufu ya Zanzar ya 1964. Alifahamisha kwamba baada ya Uchaguzi Mkuu wa Mwaka 2000, Serikali ilianzisha Wizara maalum ya kushughulikia masuala ya Utawala bora.

Alieleza kuwa mafanikio makubwa yamepatikana katika jitihada za kukuza na kuendeleza utawala bora; ambapo Zanzibar imepiga hatua kwa kuanzisha Taasisi zenye jukumu la kusimamia utendaji wa Wizara, Idara na Taasisi za Serikali kama vile Ofisi ya Mdhibiti na Mkaguzi Mkuu wa Hesabu za Serikali, Mamlaka ya Kuzuia Rushwa na Uhujumu wa Uchumi (ZAECA) Tume ya Maadili ya Viongozi wa Umma, Ofisi ya Mkurugenzi Mashtaka (DPP).

Aidha, alisema Serikali ya Mapinduzi ya Zanzibar inatambua kwamba ili mafanikio yapatikane katika kuimarisha utawala bora ni lazima Serikali ishirikiane na sekta binafsi, hivyo kwa kutambua hilo Serikali itaendelea kuhakikisha inaweka mazingira bora yatakayoiwezesha sekta binafsi kufanya shughuli zake kwa urahisi na ufanisi mkubwa.

Dk. Shein pia, aliwataka viongozi hao kuendelea kupanga na kutekeleza mikakati inayolenga katika kuondoa urasimu usio wa lazima na aina zote za uzembe ambazo zinakuwa ni vikwazo katika utoaji wa huduma kwa wananchi.

Alisisitiza dhamira ya Serikali katika kuendeleza matumizi ya TEHAMA kwa kuweka mifumo imara ya elektroniki katika uendeshaji wa shughuli na utoaji wa huduma mbali mbali.

Kwa upande wa watumishi wa umma, Rais Dk. Shein alieleza kuwa bado wapo wafanyakazi wanaochelewa kwenda kazini na pia, wapo wanaotoroka kazini na  ambao viwango vyao vya kufanya kazi haviridhishi na baadhi yao mkabala wao na maneno yao si mazuri pale wanapowahudumikia wananchi.

Alisema kuwa Serikali imebaini kuwepo vitendo vinavyofanywa na baadhi ya wafanyakazi ambavyo vinavunja misingi ya utawala bora vikiwemo rushwa, ghilba, hadaa, wizi na vyenginevyo ambavyo vyote hivyo vinapelekea wananchi kuanza kuilalamikia Serikali yao.

Pia, Rais Dk. Shein alisema kuwa Serikali imebaini baadhi ya matatizo ya udanganyifu kwenye mishahara ya wafanyakazi katika baadhi ya Wizara za Serikali, ulipelekea mishahara kulipwa kinyume na utaratibu.

Sambamba na hayo, Rais Dk. Shein alieleza kuwa kila kiongozi wa Serikali ana wajibu wa kuyafahamu mambo yaliyoelezwa kwenye MKUZA III, Ilani ya CCM ya Uchaguzi Mkuu ya mwaka 2015-2020, Dira ya Maendeleo 2020, Malengo ya Maendeleo Endelevu pamoja na Sheria mbali mbali zilizobainishwa kwenye Katiba na zile zinazohusu sekta wanazozisimamia.

Rais Dk. Shein alitaka kila kiongozi kuhakikisha kuwa anazo nakala za nyaraka hizo muhimu katika ofisi yake kama nyenzo za kufanyia kazi.

Hata hivyo, Rais Dk. Shein aliwaakumbusha viongozi hao kuweka mkazo maalum katika sekta ya mafuta na gesi katika mipanago ya maendeleo itakayoanza mwaka 2020.

Katika uzinduzi huo, pia, Rais Dk. Shein alizindua jarida la Utawala Bora pamoja na  kuzinudia Jarida la Mkakati wa Kuzuia Ruswa.

Nae Waziri wa Nchi, Ofisi ya Rais, Katiba, Sheria, Utumishi wa Umma na Utawala Bora Haroun Ali Suleiman alipongeza juhudi za Rais wa Zanzibar katika kuendeleza Utawala Bora hapa nchini.

Mapema Katibu wa Baraza la Mapinduzi na Katibu Mkuu Kiongozi Dk. Abdulhamid Yahya Mzee alieleza kuwa ili kutekeleza mipango ya maendeleo utawala bora unahitajika kwa kiasi kikubwa hatua ambayo pia inapelekea kuwa na uchumi imara.

Katika Semina hiyo mada mbali mbali zilitolewa zikiwemo Dhana ya Utawala Bora, Katibu Tume ya Maadili ya Viongozi wa Ummma, Dhana ya Utawala Bora Katika Mtizamo wa Dini, Utawala Bora na Ofisi ya Mdhibiti na Mkaguzi Mkuu wa Hesabu za Serikali, Mgngano wa Maslahi katika Utumishi wa Umma, MKUZA III 2016-2020, Ufuatiliaji wa Tathmini ya MKUZA III na Mwenendo wa Uchumi wa Zanzibar kuelekea mwaka 2020.

CHANZO: IKULU ZANZIBAR