HALOTEL YAWAFUTA MACHOZI WAFIWA WA DRC CONGO

NA MWINYIMVUA NZUKWI

Familia askari 10 wa Jeshi la Wananachi wa Tanzania (JWTZ) waliouawa nchini Congo DRC mwishoni mwa mwaka uliopita zimeeleza kuridhishwa na jitihada zinazochukuliwa na serikali za kuhakikisha zinawapatia misaada ya hali na mali ili kukabiliana na changamoto mbali mbali baada ya kuondokewa na wategemezi wao.

Akizungumza  kwa niaba ya wanafamilia nyengine 9, mmoja ya ndugu wa marehemu hao, Ame  Ramadhani  amesema misaada na ushirikiano wanaopatiwa na taasisi mbali mbali za umma na binafsi inawafariji na kuwapunguzia uchungu wa kuondokewa na jamaa zao ambao walikuwa wakiwategemea kimaisha.

Ramadhan alieleza hayo baada ya kupokea misaada mbali mbali jkutoka kwa kampuni ya halotel na kuishukuru kampuni  hiyo  kwa  msaada  huo  ambao alisema umekuja kwa wakati muafaka.

“Tunaishukuru ofisi ya Mkuu wa mkoa wa Mjini Magharibi kwa kuonesha kujali hali zetu baada ya kuondokewa na wapendwa wetu kwani toka tumepatwa na msiba huu imekuwa mstari wa mbele kutafuta misaada na inapopatikana inatukabidhi bila ya kujali wingi au uchache wake”, alieleza Ramadhan.

Awali akizungumza kwa niaba ya mkuu wa mkoa wa mjini magharibi mara  baada  ya  kupokea  misaada hiyo  kutoka  kampuni  ya  Halotel  Katibu  Tawala  Mkoa  wa  Mjini  Magharibi Hamida    Mussa Khamis  katika ofisi za mkoa huo Vuga, alisema serikali ya mkoa inafanya hivyo kwa kuthamini kazi iliyokuwa ikifanywa na askari hao na inathamini misada hiyo ambayo inatoa faraja kwa familia za askari hao, serikali na wanajeshi kwa ujumla.

“Tunaomba msichoke kila tutakapowaita kwani tunajua kidogo mnachopokea hakilingani na maisha ya ndugu na jamaa zenu ambao wamefariki wakipigania haki na amani kwa jamii. Hivyo sisi tuliobaki tunaona njia pekee ya kuenzi juhudi zao ni kutafuta kila aina ya msaada kwenu”, alisema hamida na kuushukuru uongozi wa kampuni ya Halotel kwa msaada huo.

Mkurungezi Msaidizi  wa  kampuni  hiyo kanda ya Zanzibar Abdallah  Iddi  alisema kampuni yake imeamua kutoa msaada  huo  wa fedha taslim kwa kila familia ili kuzifariji na kurudisha sehemu ya faida wanayoipata kutokana na shughuli zao hapa Zanzibar.

Mnamo mwezi Novemba mwaka uliomalizika askari 15 wa JWTZ walifariki dunia baada ya kushambuliwa wakiwa sehemu ya jeshi la kulinda amani la Umoja wa Mataifa liliopo nchini Congo DRC ambapo wanajeshi 10 kati yao walizikwa sehemu mbali mbali za Zanzibar akiwemo askari mwengine aliefariki mwezi uliopita nchini Uganda alipokuwa anapatiwa matibabu kutokana na shambuluio hilo.

Katibu Tawala Mkoa wa Mjini Magharibi Hamida Mussa Khamis akizungumza na wanafamilia za maaskari 10 za askari wa JWTZ (hawapo pichani) kabla ya kuwakabidhi msaada wa fedha taslim na fulana uliotolewa na kampuni ya Halotel kwa lengo la kuwafariji.

Mmoja wa wanafamilia za askari 10 wa JWTZ Ame Ramadhan (kushoto) akipokea msaada kota kwa mmoja ya maafisa waandamizi wa kampuni ya halotel kanda ya Zanzibar kwa ajili ya kuwafariji kutokana na msiba wa ndugu na jamaa zao waliofariki dunia nchini DRC Congo.