PARALEGAL WATAKIWA KUZINGATIA WELEDI, MIONGOZO

Na Mwinyimvua Nzukwi

WASAIDIZI wa sheria – ‘Paralegal’ wa wilaya za Magharibi ‘A’ na Kaskazini ‘B’ Unguja wametakiwa kufanya kazi zao kwa kufuata miongozo wanayopatiwa na weledi ili kuongeza tija kwa jamii.

Mwenyekiti wa Umoja wa Watu Wenye ulemavu Zanzibar (UWZ) Salma Saadat alitoa rai hiyo alipokuwa akifunga mafunzo ya siku 3 ya kuwajengea uwezo Paralegal wa Unit za wilaya ya Magharibi A na Kaskazini B Unguja.

 Alisema kufanya hivyo kutasaidia kufikiwa kwa malengo ya kueneza elimu ya sheria na huduma za kisheria kwa wananchi wengi wa wilaya hizo.

Alisema iwapo elimu na huduma za kisheria zitapatikana kwa uhakika na wakati stahiki miongoni mwa jamii, kuna uwezekano mkubwa wa kupungua kwa migogoro ya kisheria na kijamii nchini.

Alisema katika jamii ya Zanzibar kuna migogoro ya kisheria ambayo inaweza kutatuliwa au kufikia hukumu nzuri iwapo wahusika wangepatiwa usauri wa kisheria katika hatua za awali kabla ya mashauri hayo kufikishwa katika vyombo hivyo.

"Siku zote mnapaswa kutambua kuwa jamii yetu inakabiliwa na mahitaji makubwa ya elimu na huduma za kisheria, hivyo ni vyema mkafanye kazi hizo kwa jamii yetu kwa kutumia ujuzi mliopatiwa kwa moyo wa kujitolea, uwajibikaji, uwazi na ushirikiano wa hali ya juu ili kupunguza muda mwingi unaotumika na watu wetu kufuatilia masdhauri yao katika vyombo vya sheria", alieleza Mwenyekiti huyo.

Aidha aliwataka wasaidizi hao kutumia mafunzo hayo kwa lengo la kuziimarisha taasisi zao ili ziweze kujitegemea baada ya kukamilika kwa mradi uliolenga kuiwezesha jamii ya Zanzibar kuwa na uelewa mkubwa wa sheria na kupatiwa msaada wa huduma za sheria unaosimamiwa na UWZ chini ya ufadhili wa shirika la Legal Services Facilities - LSF la Tanzania bara.

“licha ya mradi huu kulenga katika kuongeza idadi ya wananchi wanaopatiwa huduma na elimu za sheria katika shehia zenu, pia ipo haja ya kuutumia kujijengea uwezo ili muweze kuendelea na kazi hiyo hata baada ya mradi kumaliza muda wake kwa manufaa ya jamii yetu”, alisema Salma.

Mapema Mkurugenzi Mtendaji wa UWZ Asya Abdulsalam alieleza kuwa katika tathmini ya awali ya utekelezaji wa mradi huo, taasisi wanazosimamia zimeonesha muelekeo mzuri licha ya kutofikiwa kwa malengo ya wananchi waliotarajiwa kufikiwa katika robo ya kwanza ya utekelezaji wa mradi huo iliyoanza mwezi Julai mwaka huu.

“Kwa ujumla robo ya kwanza baadhi ya ‘units’ zimeonesha mwelekeo mzuri wa kulifikia lengo la mradi japo kuna changamoto mbali mbali ikiwemo ya idadi ndogo ya wateja mliowafikia”, alieleza Mkurugenzi huyo.

Aliongeza kuwa kila ‘Unit’ imewekewa lengo la kuhakikisha asilimia 35 ya wakaazi wa wilaya husika inapatiwa elimu ya sheria na asilimia 30 ya wakaazi hao wanapatiwa huduma za sheria ifikapo mwisho wa mradi hivyo wasaidizi hao wanapaswa kuwa na mikakati imara ya kuyafikia malengo hayo.

Aidha alieleza umuhimu wa ‘units’ hizo kuzitumia kamati za ushauri za wilaya (TAGP) zinazoongozwa na wakuu wa wilaya na kamati za ushauri za viongozi wa kijamii (CAT) zinazowajumuisha masheha ili kurahisisha utendaji kazi wa wasaidizi hao.

Katibu Mkuu wa ‘unit’ ya wasaidizi wa sheria wa wilaya ya Kaskazini ‘B’ Unguja (NBPU) mwalimu Ali Salim Ali alieleza kuwa katika kipindi cha miezi mitatu iliyopita walifanikiwa kuwafikia jumla ya watu 487 kinyume na lengo lililowekwa la kuwafikia watu 1,787 katika kipindi hicho.

“Tulijitahidi kuitisha mikutano katika shehia mbali mbali kupitia wasaidizi wa sheria wetu, lakini mara nyingi tulipata idadi ndogo kutokana na sababu mbali mbali zikiwemo za harakati za maisha na mwamko mdogo wa jamii katika maswala ya sheria katika maeneo mengi ya wilya zetu”, alieleza mwalimu Ali.

Nae Katibu Msaidizi wa ‘unit’ ya wasaidizi wa sheria wa wilaya ya Magharibi ‘A’, Makame Mwadini alieleza kuwa mafunzo hayo yatasaidia kuimarisha utekelezaji wa kazi zao na kuahidi kuyafanyia kazi mapungufu yote yaliyoonekana katika tathmini hiyo.

“Kikubwa tulichojifunza ni kwamba tulikuwa tunafanya kazi bila ya kujiwekea malengo, hivyo tutajitahidi kuyafanyia kazi mapungufu yaliyoainishwa ili tuwe na matokeo mazuri jambo ambalo ndio madhumuni ya kuanzisha jumuiya yetu”, alisema mwadini na kuwashukuru wadau wote kwa usaidizi waliowapatia.

Mafunzo hayo yaliyolenga kutoa tathmini na kurekebisha makosa yaliyogundulika katika utekelezaji wa mradi huo unaotekelezwa katika maeneo yanayosimamiwa na umoja huo ambazo ni wilaya za Kaskazini Unguja ‘A’, Kaskazini ‘B’, Mjini na Magharibi ‘A’ Unguja ili kuleta ufanisi kwa jamii.

MWISHO.

PICHANI: Katibu Mkuu wa Unit ya Wasaidizi wa sheria (Paralegal) ya wilaya ya Kaskazini 'B' Unguja Omar Khamis (kushoto) akimsikiliza Mwenyekiti wa Umoja wa watu wenye ulemavu Zanzibar (UWZ) Salma Saadat (hayupo pichani) alipokuwa akifunga mafunzo kwa Paralegal hao yaliyotolewa na UWZ kwa ufadhili wa Legal Services Facility - LSF.