KAMATI YA UONGOZI YA TASAF UNGUJA, WATENDAJI WAOMBA WASHIRIKIANE

NA MWINYIMVUA NZUKWI

Mkuu wa Mkoa wa Mjini Magharibi ambae pia ni Mwenyekiti wa Kamati ya Kamati ya Uongozi ya Mpango wa Kunusuru Kaya Maskini TASAF III Unguja Ayoub Mohammed Mahmoud amewataka wajumbe wa Kamati hiyo kuzidisha mashirikiano na watendaji wa mpango huo ili utekelezaji wake uoneshe matokeo yanayopimika.

Akizungumza katika Mkutano wa kutathmini utekelezaji wa mpango huo katika kipindi cha mwaka 2017, uliofanyika katika ofisi za TASAF Mazizini Unguja, alisema kufanya hivyo kutasaidia kupunguza changamoto zilizobainika ikiwemo ya kutopatikana kwa matokeo yaliyotarajiwa katika baadhi ya miradi inayotekelezwa.

Alisema mradi huo umelenga kupunguza changamoto za kiuchumi na kujenga uwezo wa kaya kumudu mahitaji muhimu ya kila siku hivyo suala la umakini wakati wa uibuaji wa miradi lina umuhimu mkubwa hivyo wajumbe wa Kamati hiyo ambao ni Wakuu wa Mikoa, Wakuu wa Wilaya, Wakurugenzi wa Manispaa na Halmashauri za wilaya na Watendaji wa kisekta wana jukumu la kusadia utelelezaji wake.

Alisema iwapo viongozi wa mikoa, wilaya na shehia watayaainisha na kuyatambua maeneo ya vipaumbele, itarahisisha na kupunguza changamoto mbali mbali zinazoikabili miradi hiyo ikiwemo ya kutoendelea kwa baadhi ya miradi baada ya mradi kukamilika jambo linalorudisha nyuma juhudi za serikali za kukuza uchumi na kupambana na umaskini.

“Suala la kushirikiana katika hili si la TASAF pekee na ndio maana na sisi tukawa wajumbe wa Kamati hii hivyo ni lazima tuvitambue vipaumbele vya watu wetu kabla ya kuibua miradi ili iwe rahisi kupata tija hivyo nashauru watendaji wa tasaf muwe karibu na ofisi zetu lakini na sisi tuwe wafuatiliaji wa karibu wa utekelezaji wa miradi ya tasaf katika maeneeo yetu”, alieleza Mahmoud.

Akizungumzia utekelezaji wa mpango wa malipo kwa njia ya mtandao kwa wanufaika wa mpango huo Mahmoud aliipongeza TASAF kwa kubuni utaratibu huo ambao licha ya kurahisisha malipo kwa walengwa pia utasaidia kupunguza mianya ya ubadhirifu, udanganyifu na ucheleweshaji wa malipo ya wanufaika jambo ambalo alisisitiza liendelezwe huku taasisi hiyo ikizifanyia kazi changamoto zilizojitokeza wakati wa utekelezaji wake.

Mapema akiwasilisha taarifa ya utekelezaji wa mpango huo kwa kipindi cha kuanzia Januari hadi Disemba 2017, Mratibu wa TASAF Unguja Makame Ali Haji alisema katika kutekeleza majukumu yake ya msingi jumla ya shilingi bilioni 3,699,541,933 zililipwa kwa walengwa wa mpango wa uhaulishaji fedha ambao ni sehemu ya majukumu ya mpango katika shehia 126 za utekelezaji ndani ya mizunguko 53.

Alieleza kuwa katika utekelezaji wa miradi ya kutoa ajira za muda kwa walengwa, mpango huo katika mwaka 2016/2017 ulitekeleza miradi 106 katika shehia 104 iliyohusika katika sekta za kilimo, misitu na mazingira ambapo shilingi bilioni 2,590,649,700 zilitumika.

Amefafanua kuwa katika fedha hizo shilingi bilioni 2,006,123,300 zilitumika kulipia ujira kwa walengwa wakati shilingi milioni 584,526,400 zilitumika kwa kununulia vifaa vya kutekelezea miradi hiyo

Aliongeza kuwa katika kipindi cha kuanzia mwezi Julai hadi Novemba 2017 jumla ya miradi 190 iliyohusisha sekta za kilimo na umwagiliaji iliyokuwa na miradi 82, misitu miradi 91, uvuvi miradi 6 na mazingira 11 iliibuliwa, kusanifiwa na kutekelezwa ikiwa ni utekelezaji wa mradi huo katika kipindi cha mwaka 2017/2018 kinachoendelea.

Kwa upande wa mpango wa kuweka akiba na kukuza uchumi wa kaya Makame alieleza kuwa mpango huo umelenga kujenga msingi wa kaya kuondokana na umaskini kwa njia ya kujiwekea akiba na kuwekeza katika vikundi vya kumjengea uwezo wa kibiashara, kilimo na kuongeza thamani ya kipato katika kaya ambapo jumla ya vikundi 970 vimeundwa katika shehia 126 za utekelezaji wa mpango huo uliohusisha walengwa 13,253, wanawake 12,825 na wanaume 410.

Akielezea mafanikio ya utekelezaji wa mpango huo katika kipindi hicho Mratibu huyo alieleza kuwa asilimia 98 ya wanufaika wa mpango huo walipokea ruzuku zao katika vipindi vyote kwa wakati huku asilimia 94 ya wazazi waliomo katika mpango waliweza kutimiza masharti ya kumudu gharama za masomo ya watoto wao pamoja na kuwahamasisha watoto wenye umri wa kwenda skuli kuandikishwa na kuanza elimu ya msingi.

Hata hivyo Mratibu huyo alisema katika utekelezaji wa mpango huo katika kipindi hicho walikabiliana na changamoto mbali mbali ikiwemo ya kuhamahama kwa baadhi ya wanufaika kutoka shehia moja kwenda nyengine bila ya kutoa taarifa kulipelekea kushindwa kufanyika kwa uhaulishaji wa fedha na kuibuka kwa dhana ya kuwepo kwa wanufaika hewa jambo alilosema limeshapatiwa ufumbuzi kwa kushirikiana na masheha zinazotekeleza mpango huo.

“Mbali na hilo pia tulikutana na tatizo la upotevu wa vitendea kazi katika baadhi ya shehia uliotokana na umakini mdogo katika usimamizi  wake mara baada ya mradi kukamilika jambo ambalo linasababisha hoja nyingi kutoka kwa walengwa ambao walikabidhi vifaa kwa masheha lakini pia elimu ndogo ya ujasiriamali ilichangia kutoendelea kwa vikundi vya uzalishaji mali vilivyoanzishwa”, alieleza Makame.

Wakichangia taarifa hiyo wajumbe wa mkutano huo waliipongeza TASAF III kwa kusimamia vyema utekelezaji wa miradi iliyomo katika mpango huo na kuitaka kuwa karibu na Kamati za shehia na kuzijengea uwezo Kamati hizo ili ziweze kuleta ufanisi miradi ianayoibuliwa na kuleta tija kwa walengwa na jamii kwa ujumla.

Walisema katika kutekeleza mpango huo ipo haja kwa mpango huo kuibua miradi itakayosaidia kupunguza umaskini wa kipato cha kaya pamoja na kutafuta masoko ya bidhaa zinazozalishwa na wanufaika wa mpango huo ili kuwaendeleza kiuchumi.

“Katika kutekeleza hii dhana ya utalii kwa wote, nadhani tasaf ingeanzisha mpango wa kuwaendeleza wazalishaji wetu ili waweze kuzalisha bidhaa zinazoweza kukubalika katika soko la utalii ili waweze kunufaika na mapato yake pamoja na kuwatafutia masoko ya bidhaa zao ambazo ni bora”, alieleza mkuu wa mkoa wa kaskazini unguja Vuai Mwinyi.

Nae Mratibu wa TASAF Zanzibar Saida Saleh Adam mbali ya kuwashukuru wajumbe wa Kamati hiyo aliwaahidi kuyafanyia kazi maoni na mapendekezo waliyoyatoa ili kuongea ufanisi wa mpango huo ambao toka uanze kutekelezwa umekuwa na matokeo makubwa katika kukuza uchumi wa kaya na jamii kwa ujumla.

“Katika awamu zote za utekelezaji kuanzia awamu ya kwanza hadi hii (ya tatu) mpango huu umekuwa na mafanikio makubwa ukilinganisha na changamoto zinazojitiokeza hivyo ninawaomba waheshimiwa wakuu wa wilaya na mikoa kuendelea kuunga mkono mpango huu ikiwa ni pamoja na kupita hasa wakati maafisa wetu wanapokuwa katika maeneo yenu kwa lengo la kutilia mkazo utekeklezaji wa mpango”, alisema mratibu huyo.

Mpango wa kunusuru kaya maskini ni mmoja ya mipango ya kitaifa unaotekelezawa Tanzania bara na Zanzibar ukiwa na lengo la kuziwezesha kaya maskini sana kuongeza kipato, fursa na uwezo wa kugharamia mahitaji muhimu ya kibinaadamu kama vile chakula, afya na elimu ambapo hadi sasa kaya 126 kati ya 146 zilizofikiwa na mpango zinaendelea kunufaika.