TUMIENI FURSA KUENDELEZA MIRADI YENU - HAMIDA

NA MWINYIMVUA NZUKWI

Katibu Tawala wa Mkoa Mjini Magharibi  Hamida Mussa Khamis amewataka wajumbe wa shirikisho la vikundi vya ushirika na maendeleo vya mkoa huo kuwahimiza wananchi juu ya umuhimu wa uchimbaji na matumizi sahihi ya vyoo ili kuijiepusha na maradhi ya mripuko.

Akifungua mafunzo ya kuwajengea uwezo viongozi wa shirikisho hilo kwa niaba ya mkuu wa mkoa wa mjini magharibi Ayoub Mohammed Mahmoud alisema wana vikundi hao wana wajibu wa kueneza elimu hiyo kwa wananchi wenzao wa shehia zilimo ndani ya mkoa huo.

“Umefika wakati kwa wananchi kujenga utamaduni wa kujenga vyoo na kuvitumia ili kuondokana na maradhi mbali mbali yanayosababishwa na uchafu yakiwemo ya kipindupindu”, alisema Katibu huyo.

Alieleza kuwa baadhi ya maeneo ya mkoa huo mazingira yake hayaridhishi kutokana na kukosa vyoo vya kisasa hivyo ni vyema wanachama wa shirikisho hilo wakawa mabalozi wazuri kwa wananchi waliowazunguka ndani ya wilaya za mkoa huo.

Aidha aliwaasa wanaushirika hao kuendelea kujitolea kwa ajili ya maendeleo ya vikundi vyao ili viweze kuondokana na umasikini uliokithiri nchini unaochangiwa na ukosefu wa ajira.

“Kutokana na sababu mbali mbali zikiwemo za ongezeko la watu, serekali haina uwezo wa kuwaajiri wananchi wote hivyo ni vyema mkajikusanya katika vikundi na kuanzisha miradi ya maendeleo ili  muweze kusaidiwa kupitia mfuko wa uwezeshaji ulioanzishwa na serikali kwa madhuimuni hayo”, alisema Hamida na kuahidi kuwa serikali ya mkoa huo itaendelea kuwasaidia ili wafikie malengo waliyojiwekea.

Akitoa maelezo kabla ya ufunguzi wa mafunzo hayo Mratibu wa Shirikisho la vikundi hivyo Sadfa Othman Kaswela ameeleza kuwa lengo la kuazishwa shirikisho hilo ni kuwasaidia wananchi kujikwamua kimaisha kupitia miradi ya maendeleo wanayoiendeha.

Alisema katika kukabiliana na umaskini wananchi wa maeneo mbali mbali ya mkoa huo wameanzisha vikundi vya ushirika kwa lengo la kukabiliana na changamoto za maisha hivyo shirikisho hilo linakusudia kuviunganisha vikundi hivyo ili kupata nguvu ya pamoja.

“Vikundi vyetu huwa vianakabiliwa na changamoto kadhaa zikiwemo za uwezo mdogo wa kujiendeleza hivyo kupitia shirikisho hili tunaamini tutaweza kukabiliana na changamoto hizo na kuimarisha utekelezaji wa kazi zetu”, alieleza.

Nao baadhi ya viongozi wa shirikisho hilo kutoka katika wiliya za mkoa huo waliwahimiza wanawake wa mkoa wa Mjini Magharibi kujitokeza na kujiunga katika vikundi vya maendeleo ili kupata mafunzo yatakayowajengea uwezo wa kujitegemea na kuepukana na utengemezi katika jamii zao.

Walisema panmoja na idadi kubwa ya vikundi hivyo kuundwa na wananwake, bado kundi hilo la jamii linapaswa kuwa mstari wa mbele katika kuimarisha ushirika kama njia mojawapo ya kupambana na umaskini wa kipato ndani ya familia zao.

Mafunzo hayo yaliyofanyika katika ukumbi wa skuli ya sekondari ya Haile Selassie yaliandaliwa na shirikisho hilo kwa lengo la kujengeana uwezo ili kuvisaidia vikundi hivyo kuwa endelevu kwa lengo la kuimarisha maendeleo ya jamii.

BALOZI SEIF AKUNWA NA HATUA ZA MAO DZE TUNG

NA OTHMAN KHAMIS, OMPR

Zanzibar inatarajiwa kuwa na uwezo wa kuchezesha michezo Minane  ya Kitaifa au Kimataifa kwa siku katika kipindi kifupi kijacho kufuatia  kukamilika kwa ujenzi wa uwanja wa Michezo wa Mao Tse Tung uliopo Mperani Mtaa wa Kikwajuni Mjini Zanzibar unaotarajiwa kuwa na hadhi ya Kimataifa.

Michezo hiyo itaweza kuchezwa katika Viwanja vya Mao Tse Tung, Amani Stadium pamoja na ule wa Gombani kisiwani Pemba ambapo michezo hiyo inaweza kuchezeshwa katika vipindi viwili ndani ya siku moja.

Kauli hiyo imeyolewa na Katibu Mkuu Wizara ya  Vijana, Utamaduni, Sanaa na Michezo Zanzibar Omar Hassan Omar { Omar King} wakati akimueleza Makamu wa Pili wa Rais wa Zanzibar Balozi Seif Ali Iddi aliyefanya ziara fupi ya kuangalia maendeleo ya ujenzi wa Ujwanja huo.

Omar Hassan alisema Uwanja wa Mao Tse Tung pekee  unaweza kuchezeshwa michezo Sita kwa wakati Mmoja ikiwemo Miwili wa Mchezo Maafuru wa Soka jambo ambalo limeleta faraja kwa Wizara, Serikali pamoja na wapenda michezo Nchini.

Alisema hatua za ujenzi wa uwanja huo hivi sasa zimefikia asilimia 95% ambapo Wahandisi wa Ujenzi huo kutoka Jamuhuri ya Watu wa China wanatarajiwa kukabidhi Uwanja huo Mwezi Ujao wa Nane kwa Awamu ya kwanza wakati Awamu ya Pili watakamilisha kukabidhi rasmi ifikapo Mwezi wa Oktoba Mwaka huu.

Katibu Mkuu huyo wa Wizara ya Vijana, Utamaduni, Sanaa na Michezo Zanzibar alimueleza  Balozi Seif  kwamba Uwanja huo pia una uwezo wa kuongeza sehemu za Michezo ya Mpira wa Mikono na  Vikapu iwapo Uongozi wa Taasisi hiyo utahisi upo umuhimu wa kufanya hivyo hapo baadae.

Alieleza kuwa Wahandisi wa ujenzi huo hivi sasa wanaendelea kukamilisha kazi ndogo ndogo baada ya kumaliza uwekaji wa Nyasi Bandia katika viwanja vyote viwili wa mchezo wa soka, Osifi, vyumba vya kubadilishia nguo vya wachezaji pamoja na vyoo 48 vilivyojengwa ndani ya uwanja huo.

Akitoa shukrani zake Makamu wa Pili wa Rais wa Zanzibar Balozi Seif Ali Iddi alisema  Zanzibar inazidi kupaa kimichezo  kutokana na kuimarika kwa Miundombinu kwenye Sekta ya Michezo hasa Viwanja vya Soka.

Balozi Seif alisema Serikali Kuu itazingatia mipango maalum itakayosaidia kuimarika kwa upatikanaji wa vifaa vitavyotumiwa na Wanamichezo wa Michezo tofauti Nchini.

Makamu wa Pili wa Rais wa Zanzibar alielezea masikitiko yake kutokana na kupotea kwa Mchezo wa Magongo ambao uliiletea sifa kubwa Zanzibar Kimataifa kutokana na umahiri wa wachezaji wake kipindi hicho.

Hata hivyo Balozi Seif alionyesha matumaini yake ya kufufuka tena kwa mchezo huo unaochangia pia ongezeko la Watalii Nchini kutokana na hatua kubwa zinazochukuliwa za kuimarisha sekta ya Michezo Nchini.

 Muonekano wa Uwanja wa Mao Dze Tung unavyoonekana ukiwa katika hatua za mwisho za kumalizika ujenzi wake unaofanywa na Wahandisi kutoka Jamuhuri ya Watu wa China.

Katibu Mkuu Wizara ya  Vijana, Utamaduni, Sanaa na Michezo Zanzibar Omar Hassan Omar ‘King’ (kulia) akimuelezea Makamu wa Pili wa Rais wa Zanzibar Balozi Seif Ali Idi  hatua iliyofikia ya Ujenzi wa Uwanja wa Mao Dze Tung. Wa kwanza kutoka kulia ni Mkuu wa Mkoa Mjini Magharibi Ayoub Mohammed Mahmoud.

Makamu wa pili wa Rais wa Zanzibar Balozi Seif Ali Idi (katikati) akiwa na Mkuu wa Mkoa Mjini Magharibi Ayoub Mohamed Mahmoud (kushoto yake) na Katibu Mkuu Wizara ya Vijana, Utamaduni, Sanaa na Michezo Zanzibar Omar Hassan Omar ‘King’ (kulia yake) wakikagua baadhi ya sehemu kwenye Uwanja wa Michezo wa Mao Dze Tung unaotarajiwa kukabidhiwa serikalini hivi karibuni baada ya kukamilika kwa awamu ya kwanza ya ujenzi wake.

MAONESHO YA UTALII ZANZIBAR YAJA, KAMATI ZAZINDULIWA NA KUANZA KAZI RASMI

NA MWINYIMVUA NZUKWI

WAZIRI wa habari, utalii na mambo ya kale Zanzibar Mahmoud Thabit Kombo amezindua kamati za maandalizi za maonesho ya utalii yanayotarajiwa kufanyika mwezi Oktoba mwaka huu.

Akizungumza katika uzinduzi wa maonesho hayo, Kombo alisema maonesho hayo yanatarajiwa kushirikisha zaidi ya mashirika na taasisi mbali mbali zinazojihusisha na sekta ya utalii 300 kutoka ndani na nje ya nchi ya Zanzibar.

Alisema maonesho hayo yatakayofanyika kwa mara ya kwanza yamelenga kuonesha na kutanua wigo wa fursa zinazopatikana katika sekta ya utalii na kukuza uchumi wa Zanzibar.

“Zamani kamisheni ya utalii na mashirika mengine yanayofanya kazi katika sekta ya utalii yalikuwa yakienda nje kuzionesha na kuzitangaza fursa za utalii ziliopo nchini ila kupitia maonesho haya tutaweza kukionesha kwa uhalisia wake na sio kupitiua picha”, alisema waziri Kombo.

Amewaeleza wajumbe hao kuwa wizara yake ina matumaini makubwa ya kufanikisha maonesho hayo ambayo pia yanatarajiwa kuongeza idadi ya watalii na ajira kwa watu mbali mbali waktakaohusika na maonesho hayo kama ilivyo katika maonesho mengine yanayofanyika nchini.

Aliwataja wajumbe wanaounda Kamati kuu ya maonesho hayo kuwa ni Katibu Mtendaji wa Kamisheni ya utalii Zanzibar Dk. Vuai Iddi Lila (Mwenyekiti), Mkurugenzi wa kampuni ya ‘Zanzi Promotions’ Javed Jafferji (Makamo Mwenyekiti), Makamo Mwenyekiti wa Jumuiya ya taasisi za utalii Zanzibar - ZATI Julia Bishop anaekuwa Katibu wa kamati hiyo.

Wajumbe katika kamati hiyo ni pamoja na mwenyekiti wa jumuiya ya watembezaji watalii Zanzibar - ZATO Hassan Ali Mzee, meneja mkuu wa hoteli ya Park Hyatt Nicolas Chedro, Mkurugenzi wa uwekezaji katika mamlaka ya ukuzaji wa vitega uchumi Zanzibar – ZIPA Sharif Ali Sharif, naibu mkurugenzi wa iadara ya habari maelezo Dk. Juma Mohammed Salum na Mohamed Mbwana Mkadara kutoka mamlaka ya maonesho ya biashara ya Tanzania – TANTRADE.

Pia katika uzinduzi huo waziri kombo alizindua Kamati ya ufundi ya maonesho hayo inayoundwa na mwenyekiti wa kamisheni ya utalii Zanzibar sabah saleh ali anaekuwa Mwenyekiti wa Kamati hiyo, Meneja uendeshaji wa Kampuni ya ‘Zanzi Promotions’ adnan abass na wajumbe Sabra Juma Nassor kutoka ‘Zanzi Promotions’, Donna Da Silva kutoka ‘Zanzi Promotions’ na Meneja Msaidizi wa hoteli ya Verde Anwar Alex Fernandies.

Katika hatua nyengine waziri Kombo alizinduwa Kamati ya maamuzi ambayo itaamua juu ya washiriki watakaopatiwa zawadi zilizoandaliwa katika maonesho hayo   ambayo itaongozwa na Sabah Saleh Ali, Julia Bishop anaekuwa Makamu Mwenyekiti, Katibu wa jopo hilo Dk. Miraji Ukuti Ussi na wajumbe Ahmed Makame Haji, Andrea Boero, Nicolas Konig, Yves Montel na Omar Mmadi Mwarabu.

Maonesho ya utalii yanatarajiwa kufanyika kuanzia Oktoba 17 – 20 mwaka huu ambapo Rais wa Zanzibar na Mwenyekiti wa Baraza la Mapinzudi Dk. Ali Mohamed Shein anatarajiwa kuwa mgeni rasmi katika ufunguzi na usiku wa utoaji wa zawadi kwa washindi wa maonesho hayo.

"MAWAZIRI WA SMZ SMT KUTANENI KUIMARISHA UTENDAJI" - BALOZI SEIF

NA OTHMAN KHAMIS, OMPR

Makamu wa Pili wa Rais wa Zanzibar Balozi Seif Ali Iddi amewakumbusha  Mawaziri wa Wizara za Serikali ya Mapinduzi ya Zanzibar na  Serikali ya Jamuhuri ya Muungano wa Tanzania kukutana kwa lengo la kubadilishana uzoefu wa kiutendaji ili kuimarisha jukumu la kuwahudumia wananchi.

Alisema hatua hiyo muhimu ambayo ilikuwa ikifanyika katika kipindi tofauti itaendelea kujenga mapenzi zaidi, Umoja na Mshikamano  baina ya Watumishi wa Serikali zote mbili zilizopewa jukumu la kuwatumikia Watanzania wote.

Balozi Seif Ali Iddi alitoa kumbusho hilo wakati akizungumza na Uongozi wa Wizara ya Mambo ya Nje na Ushirikiano wa Afrika Mashariki ukiongozwa na Naibu Waziri wake Dr. Suzan Alphonce Kolimba ulipofika Ofisini kwake Vuga Mjini Zanzibar kwa mazungumzo ya kubadilishana uzoefu.

Alisema Mikutano vikao vya mara kwa mara vya mazungumzo vitakavyowajumuisha  Mawaziri wa Wizara zinazofanana za pande hizo mbili hasa pale zinapojichomoza hitilafu ndogo ndogo katika pande mbili za Muungano husaidia kupunguza kero za Muungano.

“Vikao vya mara kwa mara vya Mawaziri wa Wizara zinazofanana wale wa SMZ na SMT vina uwezo wa kupunguza au kuondoa kabisa vile vikao vya Watendaji Wakuu wanaokutana kujadili Kero zilizopo katika Muungano”. Alisema  Balozi Seif.

Makamu wa Pili wa Rais wa Zanzibar aliueleza Ujumbe huo wa Wizara ya Mambo ya Nje na Ushirikiano wa Afrika Mashariki kwamba Wananchi wa Zanzibar na Tanzania Bara  Kihistoria ni wamoja kwa Karne kadhaa zilizopita kutokana na maingiliano yao ya Mila, Kibiashara, Silka na Utamaduni.

Balozi Seif alieleza kwamba udugu huo ndio uliopelekea Waasisi wa pande hizo mbili kufikia makubaliano yaliyowezesha kurasimishwa kwa Muungano wa Tanganyika na Zanzibar uliozaa Tanzania mnamo Tarehe 26 Aprili Mwaka 1964.

Akitoa Shukrani kwa niaba ya Uongozi  wa Wizara ya Mambo ya Nje na Ushirikiano wa Afrika Mashariki Naibu Waziri wa Wizara hiyo  Dr. Suzan Alphonce Kolimba alisema kazi inayokabili Viongozi hasa Mawaziri Wapya ni kuendelea kupata mawazo na fikra za watangulizi wao ili jukumu walilokabidhiwa na Taifa walitekeleze kwa ufanisi uliotukuka.

Dr. Suzan alisema licha ya Taaluma waliyokuwa nayo Viongozi wachanga lakini bado busara na hekima za wale wazoefu zinapaswa kujumishwa pamoja katika utendaji wao kwa lengo la kuwatumikia vyema Wananchi walio wengi Mjini na Vijijini Tanzania Bara na Zanzibar kwa ujumla.

Viongozi hao wa Wizara ya Mambo ya Nje na Ushirikiano wa Afrika Mashariki wapo Zanzibar kwa shughuli za Kikazi likiwemo suala la kuratibu masuala ya Kimataifa  yanayojumuisha Serikali zote mbili ile ya SMT na SMZ.

Makamu wa Pili wa Rais wa Zanzibar Balozi Seif Ali Iddi (wa pili kushoto) akizungumza na Uongozi wa Wizara ya Mambo ya Nje na Ushirikiano wa Afrika Mashariki ulioongozwa na Naibu Waziri wa wizara hiyo Dr. Suzan  Alphonce Kolimba (kushoto), Naibu Katibu Mkuu wa Wizara hiyo Ramadhan Muombwa (wa tatu kushoto) na Kaimu Mkurugenzi wa Idara ya Mambo ya Nje Zanzibar Balozi Mohamed Haji Hamza.

BUSTANI YA KIHISTORIA YAZINDULIWA MJINI MAGHARIBI

NA MWINYIMVUA NZUKWI

Waziri wa Elimu na Mafunzo ya Amali Rikizi Pembe Juma  amewataka wananchi wa mkoa wa Mjini Magharibi kushirikiana na ofisi ya Mkuu wa  mkoa huo katika kuimarisha usafi na upendezeshaji wa mji ili uendelee kuwa kivutio kwa wageni na wenyeji.

Akizungumza katika hafla ya uzinduizi wa bustani ya kihistoria iliyopo mbele ya Ofisi ya Mkuu wa Mkoa huo, waziri Riziki ameeleza kuwa  uhifadhi wa eneo hilo utasaidia kuweka  mazingira ya mji na kuwa kivutio kikubwa kwa wageni wanaoingia nchini.

Amesema wageni wengi wanaoingia nchini huvutiwa na historia ya mji mongwe wa Zanzibar ambao ni miongoni mwa miji ya urithi wa kimataifa hivyo uhifadhi wa eneo hilo kunaongeza uhai wa histopria ya zqanzibar na eneo hilo.

“Eneo hili pamoja na kuwa na ofisi bado linaweza kutumika na wananchi kujipumzisha hivyo ni wajibu wa wafanyakazi na  wananchi wanaofika katika eneo hili kuhakikisha wanashirikiana katika kuitunza bustani hii”, alieleza Waziri Riziki.

Aidha  amewaomba  wafanyabiashara na taasisi nyengine kuunga mkono kwa kuchangia juhudi zinazochukuliwa na serikali ya mkoa wa mjini magharibi katika ukuzaji wa maendeleo ya jamii na kuipongeza benki ya Diamon Trust kwa kufadhili ujenzi na uimarishaji wa bustani hiyo.

“Sote tunaziona juhudi za mkuu wa mkoa na viongozi wenzake wanavyopigania maendeleo ya jamii hasa katika masuala ya elimu, hivyo ninawaomba watu wenye uwezo na mapenzi mema kuendelea kumuunga mkono ili kuweka mazingira mazuri ya kujifuzia kama njia moja wapo ya kuimarisha ubora wa elimu ya watoto wetu na maendeleo ya taifa”, alisema.

Akitoa taarifa katyika hafla hiyo iliyofanyika mbele ya ofisi yake, Mkuu  wa  mkoa  Mjini  Magharibi Ayoub  Mohammed  Mahmoud  alisema ujenzi wa bustani hiyo umekuja ili kutimiza ahadi iliyowekwa na serikali  ya mkoa kwa rais wa Zanzibar ya kuendelea na upendezashi wa mji kupitia manispaa  za  wilaya  zote tau za mkoa huo.

Alisema wakati wa ziara ya Rais wa Zanzibar Dk. Ali Mohamed Shein mwaka uliopita, mkoa huo pamoja na mambo mengine uliahidi kuendelea kuimarisha usafi wa mji na kuuweka katika hali ya kupendeza hivyo alizitaka manispaa hizo kuhakikisha zinasimamia sheria na kanuni dhidi ya watu watakaoharibu  mazingira ya  maeneo   mbalimbali   ya mkoa huo.

“Tulipotoa ahadi ile mbele ya Rais (Dk. Ali Mohamed Shein) tulikuwa tunaaamini kuwa tutaweza kufikia lengo la kuziweka vizuri bustani zetu lakini pia kuimarisha usafi wa maeneo yetu jambo ambalo tunashukuru wadau wa maendeleo kama DTB (Diamond Trust Bank) wameziona juhudi zetu na kuamua kutuunga mkono”, alisema Ayoub na kuishukuru benki hiyo kwa uamuzi wake huo.

Nae Mkuu  wa  kitengo  cha masoko wa benki ya DTB Sylester  Bahati akizungumza katika hafla hiyo alisema benki yake itaendelea kushirikiana na Serikali ya Mapinduzi ya Zanzibar katika  sekta  maeneo mbali mbali ikiwemo sekta  elimu ili kuhakikisha  wanachangia maendeleo ya serkta hiyo na jamii kwa ujumla.

Ujenzi wa bustani hiyo ulioanza katikati ya mwaka uliopita na kukamilika hivi karibuni, mbali ya kuwema vigae katika eneo la kuegesha magari pia umehusiaha upandaji wa maua na miti ya asili ya Zanzibar na kuweka vibaraza vya kupumzikia ulifadhiliwea na Benki DTB Tawi la Zanzibar kwa   gharama ya shilingi  milioni  45.